Nga Rivelino Çuno
Egjiptianët e Shqipërisë të bashkuar dhe me shpresë për dinjitet. Kurrë më parë , Egjiptianët e Shqipërisë nuk kanë patur një Parti krejtësisht të tyren. Kurrë me parë , nuk kanë patur as mundësi, as shpresë e as aspiratë për të qenë komunitet i përfaqësuara. Kjo ka ndodhur sepse ne si komunitet kemi patur një histori të trishtë harrese, diskriminimi, keqtrajtimi, paragjykimi dhe varfërie ekstreme. Shumë pak prej nesh nga egjiptianët e Shqipërisë, ia kanë dalë mbanë të tejkalojnë pragjet shtypëse të marxhinalizimit dhe të jetojnë si të integruar, mirëshkolluar dhe me dinjitet. Edhe pse kemi qenë kontribues thelbësore në të gjitha fushat e zhvillimet historike, politike, kulturore, institucionale, etj, në këtë vend, rrallë ose asfare na është njohur ky kontribut. Politikat sociale dhe ato integruese të ndermara nga të gjitha Qeveritë e këtyre 28 viteve, kanë qenë të pamjaftueshme, pothuajse të pandjeshme fare sepse nuk kanë qenë serioze, përmbajtësore dhe zhvillimore. Diskriminimi dhe varferia kanë qenë një peshë e rëndë mbi kokat tona duke na cenuar rëndë identitetin dhe kurajon për të qenë çfarë jemi për shumë e shumë vite. Sot që ne kemi filluar të kemi studentet dhe të diplomuarit tanë, sot që kemi filluar të kemi dëshirën dhe vizionin dhe pasionin për përfaqësim e lartesim të merituar të dinjitetit njerëzor, ne nuk mund të pranojmë e as të lejojmë të na zhbëhet identiteti. Kur para 3 vjetesh ne krijuam PEISH-in – Partinë për Europianizim dhe Integrim e Shqipërisë, ne vendosëm të krijojmë shtëpinë politike ku Egjiptianët do të gjejnë mundësinë dhe fuqinë për të siguruar e për tu përpjekur së bashku, që të fitojmë dinjitetin tonë, të drejtat tona, përfaqësimin tonë të merituar. #ZgjimNdërgjegjësimDinjitet
Autori eshte Kryetar i PEISH – Partia per Europianizim dhe Integrim e Shqipërisë.
