“Do të vras, të kemi duruar shumë”, gruaja tregon dhunën nga kunatat: Pas shkelmave e grushteve, njëra më drejtori çiften

0

Denoncimi i një 28- vjeçareje, banuese në Dibër, se ndaj saj është ushtruar dhunë fizike dhe psikologjike nga Shpresa Derti dhe motra e saj, kanë vënë në lëvizje Komisariatin e Policisë Peshkopi.

Ngjarja e rëndë ka ndodhur mesnatën e një dite më parë, por mëngjesin e djeshëm, denoncuesja A.D., 28 vjeçe, ka mbërritur në mjediset e Policisë dhe ka kallëzuar kunatat e saj, dy motrat Shpresa Derti dhe Z.M., të cilat pasi e kanë rrahur me sende të forta, e kanë kërcënuar me çiften që mbanin në shtëpinë e prindërve të saj.

“Jam dhunuar nga dy kunatat e mia. Më kanë goditur me shqelma, grushte e sende të forta. Madje, Shpresa mori çiften dhe më tha: ‘Do të vras’, ‘ti nuk mund të rrahësh nënën tonë’, ‘të kemi duruar shumë’. Nuk është hera e parë që më rrahin pa shkak. Unë nuk e kam dhunuar vjehrrën. Kunatat i kam duruar shumë. Pres që drejtësia të veprojë, ndryshe punët do të shkojnë keq”, është shprehur në Polici e dhunuara.

Menjëherë pas denoncimit, në banesën e A.D. kanë mbërritur efektivë të Komisariatit të Policisë Dibër. Ato fillimisht kanë shoqëruar dy motrat, Shpresa Derti e martuar në Dibër të Madhe, dhe Z.M. e martuar në Kukës. Madje, gjatë kontrollit të banesës është gjetur dhe sekuestruar në cilësinë e provës materiale edhe një armë gjahu. Dy motrat mohuan ta kenë dhunuar nusen e vëllait, por deklaruan se ajo u dhunonte në mënyrë sistematike nënën e tyre të moshuar.

“Nuk e kemi dhunuar, megjithëse ajo e ka rrahur nënën tonë disa herë”, pohuan në Polici dy motrat e ndaluara. Pas hetimeve të para është arrestuar në kushtet e flagrancës Shpresa Derti, madje edhe kërcënimi me armë i është faturuar asaj.

Sipas Policisë, “arrestimi i saj u bë, pasi për motive të dobëta ka ushtruar dhunë fizike ndaj nuses së vëllait të saj, shtetases A.D., 28 vjeçe, banuese në Dibër. Arma e gjahut, në momentin e sekuestrimit rezultoi pa fishekë. Arma ishte me leje dhe në pronësi të babait të dy motrave”. PANORAMA

PËRGJIGJU

Please enter your comment!
Please enter your name here

This site uses Akismet to reduce spam. Learn how your comment data is processed.