Në votimet e 30 qershorit edhe pse PS-ja garonte e vetme, Edi Rama nuk kishte kohë të verifikonte kandidatët dhe të shkuarën e tyre, duke zgjedhur si të emëruar në detyrë njerëz me të shkuar kriminale, të arrestuar dhe të dënuar.
Pikërisht nga fakti se Rama e kishte mendjen tek batutat, sot i emëruari i tij në Bashkinë e Vorës, Agim Kajmaku, është në kërkim për falsifikim të vendimeve të tij.
Po në fushatën elektorale të qershorit Rama fliste me elozhe për kandidatin socialist të Vorës, Agim Kajmaku. Shefi i qeverisë e cilësonte atë si veten, një kokëfortë.
Kur Partia Demokratike publikoi dokumente që vertetonin se Agim Kajmaku ishte denuar në Greqi dhe këtë nuk e kishte shënuar në formularin e dekriminalizimit, edhe qëndrimi i mëtejshëm i Edi Ramës nuk ishte surprizë.
Ashtu siç mbrojti dikur, Elvin Roshin, Arben Ndokën, Arbën Frrokun, Valdrin Pjetrin e të tjerë përfaqësues të mazhorancës që kishin probleme me ligjin, Rama nuk zhgënjeu as me rastin Kajmaku.
Përballë gazetarit Sokol Balla, Rama u shpreh i habitur për sulmet ndaj Kajmakut, i cili sipas tij nuk ka marrë asnjë herë asnjë gjobë, ndërsa pjesa tjetër e reagimit Ramës është aktrim në kuadër të shoë-t për të larguar vëmendjen nga e vërteta.
