Instagram do t’i paralajmërojë përdoruesit kur titrat e tyre në një fotografi ose video mund të konsiderohen fyese.
Aplikacioni për shpërndarjen e fotografive dhe të videove, i cili zotërohet nga Facebook, tha se ka përgatitur një sistem të inteligjencës artificiale për të zbuluar titrat fyese.
Ideja është që “t’iu jepet përdoruesve shansi për t’i rishqyrtuar fjalët e tyre”, tha Instagram. Në një blog të publikuar online të hënën, Instagram tha se masa e re do të nisë së zbatuari menjëherë në disa vende.
Ajo synon të ndihmojë luftimin e ngacmimeve në internet, të cilat janë bërë probleme të mëdha për platformat si Instagram, YouTube dhe Facebook, njoftoi REL.
Nëse një përdorues shtyp titra fyese në Instagram, ai do të marrë një njoftim të shpejtë që do ta informojë se titrat e tij janë të ngjashme me të tjera, që janë raportuar si ngacmime.
Përdoruesit pastaj do t’i jepet mundësia t’i ndryshojë titrat përpara se t’i publikojë.
Muaj më parë, Instagram ndërmori edhe një masë të ngjashme që i njofton përdoruesit kur komentet e tyre në postimet e njerëzve të tjerë në Instagram mund të konsiderohen fyese.
