Nga Red Varaku
Përpjekja për të interpretuar sjelljen patetike të Ramës, të mbushur plot disinformacion, arkivole dhe viktima, si një sjellje, që vjen për shkak të natyrës skizoide të tij, është një qasje e gabuar. Rama mund të jetë skizoid, por jo budalla. Ka disa arsye madhore, që e detyrojnë të prodhojë këtë panik publik.
Së pari, Edi Rama po përpiqet ta shfrytëzojë maksimalisht këtë fatkeqësi. Ai mënyrë krejt të paskrupullt, edhe këtë fatkeqësi, po e kthen në një fushatë për të riparuar imazhin e tij.
Kjo është arsyeja se pse ai i ka urdhëruar të gjithë të zhduken nga ekranet. Në çdo vend të botës njerëzit që komunikojnë kaq intensivisht me popullin janë ekspertët ose ministrat e shëndetêsisë , por ky ministrat i ka kthyer në sekretare që i urdhêron me whatsapp. Për faqen e tij të zezë jo nga zyra, por nga vrima e tij ‘anti-atomike’ në Surrel. Një turp ky, që nuk e has askund, por vetëm tek një kryeministër si ky yni .
Së dyti, një arsye tjetër se pse shfaqet sistematikisht në ekran, duke kërcënuar dhe skërmitur dhëmbët, është për tu dukur i fortë dhe për të treguar që ai e ka gjithçka nën kontroll. Për këtë qēllim në mënyrë anti-kushtetuese, ky njeri ka nxjerrë ushtrinë në terren, e cila përveç xhirove në bulevard dhe fotografive , nuk po kryen asnjë funksion tjetër për t’i ardhur në ndihmë qytetarëve.
Së treti, atij i duhet domosdoshmërisht ta portretizojë këtë pandemi si një përbindësh të frikshëm me kthetra vdekjeprurëse. Kjo sepse vetëm në luftë me një përbindësh të cilën ai po udhëheq me vetëmohim nga bunkeri, ai mund të kthehet në një personazh unifikues, një hero për të gjithë. Kjo është arsyeja se pse numrin e viktimave dhe të infektuarve e mban në nivele sa më të ulëta, sepse vetëm numrat i duhen për të dalë pas kësaj si heroi që sfidoi ‘kuçedrën’ Covid 19.
Këtë po e bën nëpërmjet njësitit të tij në shëndetësi, ku me urdhër partie vendos, sa dhe kush duhet testuar, madje njësiti i tij vendos, jo vetëm arsyen e vdekjes , por edhe të ringjalljes, siç ishte rasti i djeshëm.
Së katërti, vetëm nëpërmjet kësaj propagande, ai mund të fshehë realitetin e vërtetë të shërbimit tonë shëndetësor, realitetin e 120 shtretërve dhe numrin më të ulët të të testuarve në botë. Në fakt, ai prej kohësh është një kufomë politike, por kjo krizë nxorri në pah, humnerën se ku e ka hedhur ky edhe ekonominë e vendit. Nxorri në pah katastrofën në sistemin shëndetësor që ka shkaktuar me reformat e tij, që i kanë shkaktuar shqiptarëve miliarda.
Së pesti, duke maksimizuar panikun, ai synon që të rrisë konfuzionin. Kjo e bën më të lehtë zhvendosjen e vëmendjes nga keqmenaxhimi i kësaj krize, fjala vjen nga vonesat në marrjen e masave, nga dështimi i sistemit tonë shëndetësor, nga plani i tij ekonomik që e vendos barrën tek qytetarët dhe jo tek oligarkët, apo nga mosshpallja e gjendjes së fatkeqësisë natyrore etj.
Sigurisht, frika e tij kryesore nuk janë pasojat shkatërruese që ky virus do të sjellë tek shëndeti i qytetarëve, por rritja e zemërimit qytetar nga ky keqmenaxhim i pashembullt i krizës. Ky zemërim shpejt mund të kthehet në protesta, të cilave ai ka vendosur t’i përgjigjet me dhunë dhe represion.
Kjo është një sjellje tejet e papërgjegjshme. Përhapja e panikut, disinformacionit, kërcënimet ndaj qytetarëve, opozitës, madje dhe ekspertëve është një sjellje e patolerueshme në një situatë lufte diç e quan ai.
Në fakt pasojat që ne po përjetojmë sot, paniku, pasiguria dhe fatkeqësitë e tjera, më shumë se sa për shkak të koronavirusit, janë pasojë drejtëpërdrejtë e papërgjegjshmërisë së këtij njeriu dhe këtë tashmë e kanë të qartë të gjithë.
