Paketa e parë financiare do të siguronte pagë lufte për rreth 60 mijë persona, ashtu siç është shprehur kryeministri Rama. Më 16 prill, ai vendosi si afat për shpërndarjen e pagave fillimin e kësaj jave. Ndërsa i drejtohemi fundit të javës, a ka mbërritur paga tek të gjithë personat e identifikuar për ta marrë?
Prej më shumë se 1 muaji, që nga data 17 mars, kryeministri Rama ka dhënë disa afate për pagën e luftës, miratimi dhe dhënia e së cilës është shtyrë më shumë se një herë.
Më 17 mars, kryeministri Rama dha afatin e parë, me fundin e muajit mars si periudha në të cilën paga do t’u shkonte të gjithë atyre që qëndronin në shtëpi si pasojë e mbylljes së biznesit ku punonin.
Dy ditë më vonë, më 19 mars, kreu i qeverisë bëri publike paketën e parë financiare, duke përcaktuar një page lufte prej 26 mijë lekësh për të punësuarit në biznesin e vogël.
Afati i dytë i dhënë nga kryeministri ishte jo për shpërndarjen, por për miratimin e pagave të luftës. Të hënën e datës 6 prill Rama tha se brenda asaj jave do të miratohej dhënia e pagës së luftës për 60442 persona. Por në fillimin e javës pasardhëse, më 13 prill, drejtoresha e tatimeve znj. Delina Ibrahimaj tha se mbeteshin pa verifikuar thuajse 30 mijë të punësuar.
Gjatë po asaj jave, më 16 prill, kryeministri Rama gjatë një interviste për emisionin “Opinion” , duke folur për pagat e luftës, dha një afat për likuidimin e plotë të tyre.
“Sipas informacionit të fundit që unë kam marrë sot, praktikisht, në fillim të javës së ardhshme do jenë të gjithë të likuiduar”, tha ai.
Në fillimin e javës pasardhëse, të martën e datës 21 prill, kryeministri Rama foli sërish për pagën e luftës gjatë një komunikimi me qytetarët në faqen e tij në Facebook. Ai dha shifra të përditësuara mbi numrin e atyre që e kishin përfituar pagën e luftës, duke kërkuar ndjesë për vonesën dhe vendosur edhe një afat të ri.
“Sot ka shkuar në 52 mijë numri i atyre që kanë përfituar pagën e luftës. Deri ditën e premte kryejmë rreth 8 mijë verifikimet e fundit, plus dhe shqyrtimi i ankesave që mbyll dhe transhën e parë të paketës së parë.”, tha Rama.
Këtë qëndrim ai e përforcoi edhe ditën e nesërme, më 22 prill, ku iu rikthye edhe një herë pagës së luftës nga paketa e parë ekonomike.
“Brenda javës mbyllen verifikimet e ankimimeve për paketën e parë, nga ku priten disa mijëra përfitues të tjerë”, tha Rama.
Të premten e datës 24 prill, ditë në të cilën kryeministri Rama kishte vendosur afatin e radhës për mbylljen e transhës së parë të paketës së parë, zhvilloi një tjetër bashkëbisedim me qytetarët në Facebook. Duke folur për pagën e parë të luftës, ai bëri me dije se ishin dërguar në llogaritë e qytetarëve pak më shumë se 54 mijë paga lufte, nga 52 mijë që ishin ditën e martë.
“Tani që flasim, përpara se të vija këtu, 54,243 pagesa nga paketa e parë janë në kontot e personave. Sic ju kam thënë, faza e verifikimit të një pjese prej disa mijërash vazhdon.”, tha ai.
Duke u mbështetur në fjalët e kreut të qeverisë, nuk kanë arritur ende të kryhen 8 mijë verifikimet e fundit deri ditën e sotme, por kjo fazë po vazhdon. Nga numri total i përfituesve të shpallur nga kryeministri Rama, 60,442, mbeten ende pa përfituar rreth 6 mijë persona.
Në këtë mënyrë, dy afatet e tjera që kryeministri ka vendosur për këtë javë, likuidimi i plotë brenda ditës së martë i pagave të luftës dhe mbyllja e transhës së parë të paketës së parë brenda ditës së premte, nuk janë respektuar. Faktoje.al
