Sulmet ndaj Opozitës janë alibi e qëndrimit të Ramës në pushtet

0

Nga Red Varaku

Të çudit fakti që ka akoma njerëz që fajësojnë rëndom opozitën pse e keqja s’po ndalet dhe pse Shqipëria po rrëshket drejt autokracisë. Ndërkohë, Rama dhe keqqeverisja e tij merren si fakte të mirëqena.

Është e vërtetë që opozita mund të ketë disa përgjegjësi, të cilat ajo i ka pranuar pa hezitim, por të akuzosh opozitën sikur ajo të ishte përgjegjëse për degradimin e Shqipërisë, kjo tejkalon edhe cinizmin më grotesk.

Në fakt, nuk është se këta njerëz meritojnë ndonjë shpjegim, sepse beteja që ka bërë opozita, është beteja më e madhe opozitare e këtyre 30 viteve, e cila u pasua nga dy aktet më të forta politike në historinë politike të njëqind viteve të fundit, djegja e mandateve dhe bojkoti i zgjedhjeve.

Por, sigurisht njerëzit e pavëmendshëm e meritojnë një shpjegim për t’i shpëtuar kurthit të kësaj propagande.

Së pari, është bërë e zakonshme, të dëgjosh të thuhet se opozita po bën lojën e Ramës dhe për këtë sillet si argument marrëveshja e 17 majit.

Në fakt ky është një argument shumë naiv, sepse të gjithë e dimë që kjo marrëveshje u bë nën presionin dhe garancinë e faktorit ndërkombëtar që votat nuk do të vidhen dhe koha i dha të drejtë opozitës.

Së dyti, prej gati një viti e gjysëm, opozita është në një betejë pa kompromis me një regjim autokrat pa skrupuj për të rikthyer vlerat perëndimore në Shqipëri. Ajo ka thënë të vërteta të mëdha duke dokumentuar dhe denoncuar publikisht çdo aferë të kësaj qeverie.

Por, shumëkush e harron që kjo është një qeveri që s’do t’ia dijë për asgjë, sepse ka dalë nga vjedhja, jo nga vota, dhe atë mund ta ndalë vetëm populli, duke i hequr me votë mandatin për të qeverisur dhe askush tjetër.

Së treti, edhe pse ka përballë një regjim, i cili ka degraduar në sulme të hapura ndaj saj dhe është investuar politikisht për ta asgjësuar atë me dhunë shantazh, opozita ia ka dalë të prezantojë një program për daljen nga kriza ekonomike ku ndodhet vendi

Ky program është hartuar si asnjëherë më parë nga një parti opozitare, në dialog me qytetarët e në bashkëpunim me një duzinë ekspertësh të nivelit më të lartë ndërkombëtar.

Pjesë të këtij programi ajo i ka artikuluar publikisht siç është alternativa për sistemin fiskal, alternativa për bujaësinë, alternativa për shëndetësinë, alternativa për arsimin dhe alternativa për sigurinë e rendin.

Por, idetë e saj nuk kanë gjetur reflektim në media, sepse mediat janë kthyer në kurtizane të regjimit dhe të vetmet lajme dhe komente të reflektuara mediatikisht në lidhje me opozitën kanë qenë gjithmonë thashethemet dhe batutat me qëllim diversionin brenda saj.

Së katërti, gjëja që të gjithë harrojnë kur gjykojnë opozitën si humbëse është se opozita nuk humbi në 2017. Ajo u vodh dhe këtë na e vërtetuan përgjimet e BILD dhe Zërit të Amerikës.

Por, në vend që të merren me atë që vodhi, ata gjykojnë atë që u vodh, e kjo nuk ka ku të rrijë. Pra, PD u vodh , dhe kêtë na e dëshmuan përgjimet, që do të thotë se ajo nuk është sot në opozitë ngaqë nuk e voton populli, por sepse vullneti i zgjedhësve u deformua me banda dhe kriminelë.

Së pesti, pakënaqësia e këtyre njerëzve ndaj opozitës shkon deri në pikën ku thuhet se këtu të gjithë janë njëlloj, a thua se qeveria gjykohet për çka thotë, ndërsa opozita gjykohet për çka bën dhe jo e kundërta, duke harruar që çdo sulm kundër opozitës bëhet alibia e qëndrimit të Ramës në pushtet.

E së fundi, duhet të jetë e qartë që Opozita nuk ka mandat për të qeverisur vendin. Ajo ka vetëm fjalën dhe pasionin politik për t’i dhënë fund tranzicionit politik në Shqipëri.

PËRGJIGJU

Please enter your comment!
Please enter your name here

This site uses Akismet to reduce spam. Learn how your comment data is processed.