Një tjetër sasi e madhe kokaine që ishte rrugës për në Durrës është kapur gjatë një operacioni të DEA-s amerikane.
Operacioni duket se ka nisur nga Panamaja, ku një ngarkesë me banane është nisur me destinacion Shqipërinë, por që brenda kishin 70 kilogramë kokainë.
Por edhe këtë herë, duke mos i besuar policisë shqiptare, forcat amerikane kanë vendosur që të veprojnë pa mbërritur në destinacion.
Operacioni është zhvilluar në portin e Pireut, Greqi, ku fillimisht kontrolli me rreze lazer ka dhënë shenjat e ngarkesës së dyshimtë.
Më pas, kontrolli me një pajisje me emrin ‘Axel’ është vërtetuar se droga ishte futur brenda kontenierit me banane.
Lënda narkotike ishte e ndarë në 60 pako, me destinacion portin e Durrësit.
Konteineri ndodhej në portin e Pireut prej disa ditësh, në pritje për tu ringarkuar në anije me destinacion portin e Durrësit.
Nuk është hera e parë që DEA sekuestron drogë me destinacion Durrësin, mall i nisur nga Amerika Latine. Goditjet janë bërë pa mbërritur ngarkesat në Durrës, për shkak se ekspertët amerikanë nuk i besojnë policisë shqiptare.
