Ministria e Shëndetësisë ka publikuar dy urdhrat, përmes të cilëve kufizohet lëvizja gjatë orëve të natës në vend si edhe përcaktohet orari i mbylljes së aktivitetit të bareve dhe restoranteve.
Sipas urdhrit të Ministrisë së Shëndetësisë, duke filluar nga nesër, për një afat tre javor, pra deri më datë 02 dhjetor, kufizohet lëvizja e qytetarëve nga ora 22:00 e mbrëmjes deri në 06:00 të mëngjesit.
I njëjti rregull vlen edhe për baret, fast food-et dhe restorantet. Bizneset në fjalë do të mbyllen nga ora 22:00 deri në 06:00 të mëngjesit përveç shërbimit të shpërndarjes që nuk ka kufizime.
Për të lëvizur brenda orës policore, për ata që janë në punë, apo për arsye shëndetësore, duhet t’u rikthehemi autorizimeve te e-albania, thuhet në urdhrin e dytë të firmosur nga ministrja e Shëndetësisë, Ogerta Manastirliu.
Sa do të jenë gjobat për shkelësit
Ja disa nga masat që kanë qenë në fuqi në muajin mars
– Gjobë 10 mijë lekë të reja nëse shkel orarin policor pa arsye
– Tërheqje e lejedrejtimit
– Gjobë ose burgim deri në 6 muaj nëse nuk zbaton urdhrat
– Gjobë 5-10 milionë lekë të vjetra për bizneset ose deri në 2 vite burg për administratorët që që nuk zbatojnë urdhrat dhe përsërisin shkeljen
– Nga 2 deri në 3 vite burg nëse je ose jo mbartës i sëmundjes dhe nuk zbaton karantimin apo izolimin
– Nga 2 deri në 5 vite burg nëse përhap me dashje sëmundjen mbartëse
– Gjobë ose 2 vite burg kur kjo vepër penale bëhet nga pakujdesia
– Nga 3 deri në 8 vite burg kur kjo vepër ka shkaktuar pasoja të rënda në njerëz.
***
Gjatë ditës së djeshme, Komiteti Teknik i Ekspertëve propozoi ndryshimet në fjalë duke i arsyetuar me rritjen e numrit të rasteve pozitive me koronavirus.
Shkollat dhe kopshtet nuk do të jenë të prekur nga karantina e pjesshme pasi ekspertët deklaruan se nuk është parë rritje e rasteve të infeksioneve me hapjen e tyre dhe shkollat nuk janë parë si vatra infeksioni.
“Neve na rezulton se që në shkolla të ketë shpërndarje te infeksionit më të madhe se më parë. Nuk i kemi shkollat në vatra infeksioni. Ne po monitorimjmë me shumë kujdes dhe masat merren në vazhdim të situatës epidemiologjike. Shohim fenomenin, zbulojmë faktorët dhe shohin çfarë mund të bëjmë për parandalimin. Sot për sot shkollat nuk kanë influencuar në një rëndim të madh të situatës”, tha Rakacolli dje.
Ndërkohë Komiteti Teknik i Ekspertëve vendosi edhe hyrjen në fuqi të testeve të shpejta që do të nxjerrin përgjigjen për 40 minuta për grupe të caktuara ndërkohë që do të hiqet ritestimi pasi sipas vlerësimit të tyre është vënë re se pas 14 ditësh një infektuar me Covid-19 nuk e përhap virusin edhe në rast se vazhdon të jetë pozitiv.
