BallinaIntervistaINTERVISTA/Covid tek fëmijët, Gjeorgjina Kuli: Grupmoshat më të prekura, trajtimi kryhet në...

INTERVISTA/Covid tek fëmijët, Gjeorgjina Kuli: Grupmoshat më të prekura, trajtimi kryhet në bazë të simptomave

Mjekja pediatre-infeksioniste Gjeorgjina Kuli shpjegoi për “Abc-ja e Shëndetit” ndikimin që ka Covid tek fëmijët dhe simptomat që ata paraqesin. Kuli tha se moshat shkollore janë më të predispozuara për t’u infektuar ndërsa ata më të vegjlit janë më pak infektues. Më tej, ajo shpjegoi se trajtimi me medikamente kryhet në bazë të simptomave që ata shfaqin.

Intervista e plotë:

Momentalisht numri i fëmijëve të shtruar në repartin tonë Covid luahet nga 4-5 në 10 fëmijë, pra asnjëherë nuk kemi arritur kapacitetet maksimale të repartit, por kemi parë dhe forma të mesme dhe të rënda. Madje, kanë kërkuar dhe intubim, por momentalisht është një fëmijë i hospitalizuar në repartin e terapisë intensive pediatrike kurse të tjerët janë me komplikacione të mushkërive por që gjendja është në kontroll.

Pse kemi rritje të numrit të të infektuarve tek fëmijët?

Shifrat në rritje shkojnë paralelisht me rritjen në total sepse ne jemi tek 4 përqind dhe në vendet e tjera janë 7-8 përqind. Nga numri total vetëm 8 përqind është mosha 0-14 vjeç por duke u shtuar rastet pozitive shtohen dhe rastet e fëmijëve. Që nga fillimi i pandemisë kemi patur 700 fëmijë pozitiv nga të cilat vetëm një pjesë e vogël janë hospitalizuar, më pak se 2-3 përqind kanë kërkuar nevojë më të specializuar dhe ata të cilët kanë patur nevojë për suplemente oksigjeni apo kanë manifestuar një komplikacion të infeksionit.

Grupmosha më e rrezikuar?

Të gjitha moshat preken njësoj, por sigurisht nga veçoritë që kanë grupmoshat fëminore kanë dhe incidenca të ndryshme. Moshat shkollore janë më të predispozuar për t’u infektuar dhe më e përhapur infeksionin sepse bëjnë jetë më sociale. Të vegjlit është parë që janë më pak infektues sepse kanë dhe ngarkesë virale më të vogël. Grupmoshat mbi 11 vjeç dhe deri në arsimin preuniversitar mundësia e prekjes është njësoj si ndaj ekspozimit.

Cilat janë shenjat kryesore?

Fëmijët kanë forma më të lehta, me shenjat e një infeksioni të sipërm respirator me temperaturë, rrufë, kollë ndonjëherë dhe me diarre dhe të vjella, pa shenja specifike pasi në bazë të shenjave nuk mund të themi se është infeksion nga Covid apo nga një virus tjetër. Vetëm ekzaminimi me tampon përcakton diagnozën. testi serologjik nuk ndihmon për diagnozë, por thjesht për të parë nëse ka kaluar infeksioni dhe sa mbrojtje ka lënë.

Protokolli i trajtimit

Trajtimi si në të gjithë grupmoshat është simptomatik. Për fëmijët ka një numër më të reduktuar preparatesh, sepse nëse në disa preparate kanë marrë aprovimin e OBSH-së apo organizatave të tjera mjekësore tek fëmijët, preparatet antivirale ose të tjera simptomatike që përdoren tek të rriturit nuk janë të aprovuara për t’u përdorur vetëm në kushtet klinike apo në rastet e veçanta kur kanë indikacion absolut.

Mjekimi konsiston në mjekimin e temperaturës, në rehidrimin e fëmijës duke i dhënë lëngje sepse duke qenë një organizëm më i vogël humbja e tyre mund të shkaktojë dehidrim dhe pasoja më të rënda se tek të rriturit. Zinku është një suplement tjetër që rekomandohet, në fakt nuk është vërtetuar se ka efekt në parandalimin nga prekja e virusit por ka një influencë të mirë në shkurtimin e shenjave gastrointestinale siç janë diarreja dhe të vjellat.

A duhet të mbajë maska fëmijët?

Maska rekomandohet mbi 6-vjeç. Me të vërtetë që ka rritje të numrit, por nuk ka rritje të rasteve pozitive për hir të fëmijëve madje dhe në ato raste kur ka patur vatra në shkollë është parë se ka qarkulluar midis të rriturve dhe jo vatra të shpërthyera nga vetë fëmijët dhe përhapja nga fëmijët është më e pakët.

A pëson mutacion Covid tek fëmijët?

Kur ka mbivendosje bakteriale përdorin antibiotik. Mund të përdorin kortikosteroid në rastet kur ke insuficiencë respiratore apo dhe mjekime të tjera nëse ka hemoragjira apo preparate ose kur ka tendecë për trombe mund të përdoren dhe antikoagulues sipas komplikacioneve por mjekimi diktohet nga format klinike me të cilat paraqitet fëmija.

Protokolli e trajtimit me medikamente

Covid tek fëmijët ka një klasifikim të përcaktuar shumë mirë madje ka disa komplikacione që nuk i shohim tek të rriturit siç është sëmundja e kawasakit, një komplikacion që manifestohet me temperaturë të lartë, me shenja në lëkurë, me fryrje të duarve dhe këmbëve, skuqje të syve, çarjes së mukozave të gojës dhe që mund të japë dhe komplikacione në zemër prandaj themi që është një situatë serioze dhe ndonjëherë kritike me këtë komplikacion.

Këshilla për prindërit

Nuk mund t’u themi këshilla paraprake, por të komunikojnë me pediatrin apo me mjekun e familjes në ato raste kur ato gjykojnë se situata është pak më serioze e rekomandojnë dhe për konsulta në kushte spitalore dhe sipas gjendjes dhe rastit neve japim terapinë që duhet. Të mos veprojnë sipas dëshirës së tyre dhe të mos tremben nga një temperaturë dhe të paraqiten në repart sepse as nuk e ndihmojnë fëmijën por bëhen shkak për përhapjen e infeksionit dhe të mbajnë komunikim të rregullt me instancat e kujdesit shëndetësor.

spot_imgspot_imgspot_imgspot_img
spot_img
RELATED ARTICLES

Most Popular