Konfirmohet në detyrë Florjan Kalaja, gjyqtar pranë Gjykatës së Rrethit Gjyqësor Vlorë.
Gjyqtari u përball të mërkurën me gjetjet e Komisionit të Pavarur të Kualifikimit, KPK në të tri kriteret e rivlerësimit, atë të pasurisë, pastërtisë së figurës dhe profesionalizmit.
Trupa gjykuese që kreu procesin e Vettingut për gjyqtarin kryesohej nga Xhensila Pine, me relator Olsi Komicin dhe anëtare Firdes Shulin, të cilët arritën në përfundimin se Kalaja nuk ka probleme në asnjë kritretet e vlerësimit.
Në cilësinë e vëzhguesit ndërkombëtar ishte i pranishëm Branko Hrvatin.
Florjan Kalaja ka përfunduar studimet në Shkollën e Magjistraturës në vitin 2011 dhe është emëruar në të njëjtin vit në Gjykatën e Vlorës.
Në vitet 2016-2019, ai ka punuar edhe si ndihmësmagjistrat në Gjykatën e Lartë, ndërsa aktualisht e ushtron funksionin si gjyqtar i deleguar pranë Gjykatës së Apelit Durrës.