Opinionisti në emisionin “Zonë e Lirë” Arjan Çuri ka zbuluar edhe një fjali që është kapur nga përgjimet e antimafias italiane, që nuk ishte publikuar më parë.
Sipas Çurit mafiozët e Ndraghetës kërkonin që dyqani që do të hapnin në Shqipëri të ishte pranë drejtorisë së Tatimeve, dhe pikërisht kështu ka ndodhur. Analisti paralajmëroi se në ditët në vijim do të dalin të tjera përgjime ”përvëluese” që do të çojnë edhe në rrëzimin e qeverisë në zgjedhjet e Prillit.
“Është më e thjeshtë se sa e bëjnë këta… Nga 2013 dhe këtej, ndërtimet janë katërfishuar në volum. Ndërkohë që kreditimi bankar, blerjet, të ardhurat e njerëzve, kanë rënë. Harrojini përgjimet, nga erdhën këto lekë. Neve na duhet kjo, që fakti që në treg janë më shumë lekë se sa ne prodhojmë si vend, fakti që bëhen ndërtime marramendëse, i bie që leku ka ardhur nga jashtë dhe është i pistë.
Vetëm fakti që hyrje-daljet në ekonominë tonë janë në pabarazi, i bie ka qarkulluar para e pistë. Tani shumë afër do dalin përgjimet konkrete me kë kanë folur… Unë kam dëgjuar vazhdimin e një përgjimi. Prokurori i antimafias italiane tha që Ndrangheta është futur shumë thellë në Shqipëri dhe ka lidhje me politikanë.
Kolegu im italian, se gazetarët në vende të tjera të botës kanë kontakt me Prokurorët, më tha një fjali që është thënë në këto përgjime, s’ka dalë akoma kjo po e nxjerr unë. Ata kanë thënë se “do ta hapim dyqanin afër Drejtorisë së Përgjithshme të Tatimeve që të bëjmë sikur shesim rroba dhe të takojmë drejtorët e mëdhenj”. Vajta verifikova dyqanin dhe ishte vërtet ngjitur me drejtorinë e Tatimeve”, tha Arjan Çuri.
