Bashkimi Evropian ka kërkuar hetim për akuzat e shitblerjes së votës në zgjedhjet e 25 prillit. Eurokomisioneri Oliver Varhelyi deklaroi në Tiranë se Brukseli pret rezultatet të qarta për parregullsitë e procesit zgjedhor. Sa i përket Non-Paper të publikuar nga Der Standard, ku kryeministri Rama dhe Aleksandër Vuçiç kanë qenë pjesë e idesë për ndryshimin e kufijve mes Kosovës dhe Serbisë, Varhelyi u shpreh se kjo nuk mund të jetë e vërtetë pasi teza e ndryshimit të kufijve është me pasoja të rënda për rajonin
Disa ditë pas zgjedhjeve të 25 prillit, Bashkimi Europian ka kërkuar hetim dhe rezultate për gjithë parregullsitë e procesit zgjedhor dhe akuzave për shitblerje votash. Mesazhin e dha Komisioneri për Zgjerimin, Oliver Varheli, përkrah kryeministrit Edi Rama, teksa zbriti këtë mëngjes në aeroportin e Rinasit, për të sjellë dozat e vaksinës Pfizer, që Brukseli dhuroi për Shqipërinë.
Komisioneri për Zgjerimin ishte i qartë me klasën poltike, kur deklaroi se rruga drejt Bashkimit Europian mund të vazhdojë vetëm me një parlament të plotë.
I gjendur përballë kërkesave të Brukselit, teksa opozita e akuzon për manipulim të procesit, zgjedhor, kryeministri Edi Rama u mjaftua me përsëritjen e ftesës për bashkëpunim, drejtuar Partisë Demokratike.
Komisioneri për Zgjerim iu përgjigj edhe lajmeve të fundit, që kanë trazuar ujërat në rajon, për ekzistencën e një dokumenti Non-Paper, që përmbante rishikim të kufijve mes Kosovës dhe Serbisë. Megjithëse mohoi ekzistencën e një harte të tillë, Varheli dha mesazhe te qarta se një dokument i tillë do të sillte vetëm luftë.
Ndërsa kryeministri Edi Rama, i cili sipas gazetës austriake ‘Der Standard’ ka pranuar se e ka parë një dokument të tillë, preferoi të ironizonte në përgjigjen e tij.
