BallinaKryesoreZbardhet debati me dyer të mbyllura/Nga kërkesa për protesta te 9 paditë...

Zbardhet debati me dyer të mbyllura/Nga kërkesa për protesta te 9 paditë në SPAK, Basha: Në shtator hyjmë në Parlament! Marku: Të ngrihemi në protesta! Ndryshe…

Kryetari i Partisë Demokratike, Lulzim Basha, ka shuar çdo dilemë të deputetëve të zgjedhur dhe të gjithë atyre që gjatë ditëve të fundit kanë ngritur pyetjen nëse PD do të shkojë në Parlament në shtator.

Gjatë takimit të parë me deputetët e rinj dhe kandidatët për deputetë, Lulzim Basha është shprehur se do të hyjnë në Parlament.

“Ne do të hyjmë në Parlament, do të shfrytëzojmë çdo mënyrë për të denoncuar masakrën elektorale që është bërë në 25 prill”, mësohet të ketë thënë kryedemokrati Basha, dje gjatë mbledhjes me Grupin e ri Parlamentar dhe kandidatët e 25 prillit.

“Pavarësisht vjedhjes më të madhe të votave në historinë e Shqipërisë të kryer nga Rama-Doshi, ne sollëm një arritje të madhe për partinë tonë dhe për vendin tonë. Ne, pa hequr dorë nga vlerat tona, u bëmë më të fortë kudo. Tani do të luftojmë me të gjitha fuqinë tonë derisa në fitore. Fushata jonë nuk ka mbaruar, ajo vazhdon me energji maksimale.

Unë do takoj njerëzit në terren për t’i falënderuar, për të biseduar me ta, për t’i dëgjuar, duke ju kërkuar që edhe ju të bëni të njëjtën gjë në ditët në vijim. Së bashku do të fitojmë! Ne duhet te përfundojmë gjithë procesin e mbledhjeve të fakteve për masakrën elektorale në lidhje me zgjedhjet dhe pastaj do të flasim me forumet përkatëse për hapat e ardhshëm”, ka vijuar kreu i opozitës.

Megjithatë, mbledhja e parë me Grupin e ri Parlamentar është shoqëruar me debate dhe pyetje të shumta për paqartësitë e deputetëve të rinj të grupit parlamentar.

Dy deputetët e rinj, Mark Marku dhe Agron Gjekmarkaj, kanë kërkuar protesta. Ndërkohë, nga ana e tij Basha nuk e ka përjashtuar si mundësi, por kërkoi që të fokusoheshin te mbledhja e fakteve të manipulimit të votës. Ndërsa në këtë pikë drejtuesi politik i Vlorës, Bujar Leskaj, ka thënë se pse gjatë gjithë fushatës nuk ka pasur një padi penale ndaj Kryeministrit.

Në përgjigje të kësaj pyetjeje, Basha ka paralajmëruar 4-5 padi penale në emër të kreut të qeverisë. Gazeta “Panorama.al” ka mësuar përmes burimeve se njëra prej tyre bën fjalë për urdhrin që ka dhënë Kryeministri Rama për lirimin sipas kryedemokratit Basha të një grupi kriminal nga burgu.

DEBATI NË MBLEDHJE

Lulzim Basha: Dua të falënderoj secilin nga ju. Ju keni punuar shumë fort me besimin e palëkundur në rrugën tonë, në demokracinë tonë, në vendin tonë. Pavarësisht vjedhjes më të madhe të votave në historinë e Shqipërisë të kryer nga Rama-Doshi, ne sollëm një arritje të madhe për partinë tonë dhe për vendin tonë. Ne, pa hequr dorë nga vlerat tona, u bëmë më të fortë kudo. Tani do të luftojmë me të gjitha fuqinë tonë derisa në fitore. Fushata jonë nuk ka mbaruar, ajo vazhdon me energji maksimale.

Mark Marku: Ne duhet të jemi koherentë. Atë që themi tani, ta themi edhe në shtator. A do të hyjmë në Parlament ,apo jo?

Lulzim Basha: Ne do të hyjmë në Parlament, do të shfrytëzojmë çdo mënyrë për të denoncuar masakrën elektorale që është bërë në 25 prill. Zgjedhjet janë manipuluar. Në PD ka një grup që punon 24 orë për të mbledhur të gjitha faktet për të bërë librin e zi. Juristët po e ndjekin këtë çështje në tri drejtime. Me këqyrjen e pamjeve filmike, me provat e tjera në terren dhe me ankesat që do të depozitojmë.

Mark Marku: Këto janë çështje juridike që duhet t’i ndjekin juristët e PD. Kjo nuk na hynë në punë neve. Mua lezhjanët më kërkojnë se si do t’ua mbroj votën, duan protesta. Le të ngrihemi në protesta! Ndryshe përse duhet të shkojmë në struktura, çfarë duhet t’u themi, të shkojmë të pimë raki me ta?! (Mark Marku ka marrë edhe mbështetjen e Gjekmarkajt).

Lulzim Basha: Protestat janë gjëja më e thjeshtë që mund të bëjmë, por puna është se duhet të dimë se ku shkojmë me protestat. Ne do të luftojmë me të gjitha mundësitë dhe mjetet e mundshme. Për momentin duhet të përfundojmë procesin e mbledhjes së fakteve që do vijojë deri të hënën e ardhshme. Kemi bërë 190 padi penale gjatë gjithë fushatës dhe do të vijojmë ta bëjmë.

Bujar Leskaj: Ne kemi çuar në SPAK çdo njeri të mundshëm, por a kemi çuar ne në SPAK Edi Ramën?

Lulzim Basha: Sigurisht që do ketë padi penale edhe në emrin e tij të drejtpërdrejtë. Nga 9 padi penale që do të depozitohen këto ditë duke filluar nga nesër (sot), ku 4 ose 5 padi janë në emër të Edi Ramës. Njëra prej tyre bën fjalë për urdhërimin nga Edi Rama për lirimin e një bande kriminale para zgjedhjeve.

Xhelal Mziu: Në Qarkun e Dibrës gjatë javës së fundit të zgjedhjeve janë shpërndarë paga lufte nga pandemia.

Aldo Bumçi:
 U bënë një javë nga përfundimi i numërimit edhe për kandidatët, ndërkohë nuk ka një deklaratë të qartë nga ana jonë se çfarë do bëjmë?! Do t’i njohim zgjedhjet apo jo?

Lulzim Basha: Mendoj se kam qenë shumë i qartë nga dy deklaratat që kam dhënë dy ditët e fundit. Nuk e di se çfarë paqartësie ka. PANORAMA

 

spot_imgspot_imgspot_imgspot_img
spot_img
RELATED ARTICLES

Most Popular