Dënohet me 18 vite burg efektivi Nevaldo Hajdaraj, i cili vrau Klodian Rashën në vitin 2020.
Gazetarja Klodiana Lala raporton për BalkanWeb se Gjykata e Apelit ashpërsoi masën e dënimit për ish-policin qe qëlloi për vdekje me plumb pas shpine të riun ne orët e para te 8 dhjetorit 2020 ne rrugicën e shtëpisë së 25vjeçarit në Laprakë. Nga 15 vite që ishte dënuar nga gjykata e Tiranës, shkalla e dyte e gjyqësorit e cilësoi fajtor ish-policin për akuzën e vrasjes me dashje dhe dënoi me 18 vite burgim.
Hajdaraj sipas Apelit e vrau me dashje 25 vjecarin, teksa ky i fundit largohej me vrap duke mos iu bindur urdhrit të policisë për t’u ndalur pasi kishte dalë jashtë orës policore që ishte vendosur atëkohë për shkak të pandemisë.
Ish-polici pretendoi se qëlloi mbi Rashën për shkak se kishte dyshime se ai ishte i armatosur dhe ndjeu rrezik, por kjo rezultoi e pavërtetë, pasi i riu nuk kishte në duar asnjë send të paligjshëm.
Vendimi per Nevaldo Hajdarajn pritej të shpallej paraditen e së mërkurës, por gjykata vendosi të dëgjojë palët për të dytën herë pasi në seancën e zhvilluar më 8 Mars kishte pësuar defekt sistemi audio dhe procesverbali konsiderohej i pavlefshëm.
Në seancë pasi dëgjoi prokurorinë dhe mbrojtjen gjykata i dha fjalën babait të Klodian Rashës. Qazim Rasha këmbënguli për drejtësi dhe iu kërkoi gjyqtarëve ta vinin veten në vendin e tij.
Vrasja e Klodian Rashës solli reagime të forta dhe protesta që çuan në largimin e ministrit të Brendshëm të kohës, Sandër Lleshaj.
