Shërbimi i inteligjencës amerikane u ka dhënë ukrainasve informacione që i mundësuan ata të vrisnin disa gjeneralë rusë pranë vijës së frontit, raportoi të mërkurën “New York Times”, duke cituar zyrtarë të paidentifikuar amerikanë.
Uashingtoni i ka ofruar Kievit informacion të detajuar mbi lëvizjet e trupave, vendndodhjet dhe detaje të tjera të qendrave komanduese të lëvizshme të ushtrisë ruse dhe sulme të tjera që rezultuan në vrasjen e oficerëve të lartë rusë, sipas raportit.
As Pentagoni dhe as Shtëpia e Bardhë nuk u përgjigjën kur “Reuters” dhe agjencia franceze e lajmeve u përpoqën t’i kontaktonin ata për të komentuar artikullin e “New York Times”.
Qeveria ukrainase pretendon se forcat e saj kanë vrarë rreth 12 gjeneralë rusë. Në fillim të marsit, komuna e Novorossiysk në Rusinë jugore konfirmoi se gjenerali Andrei Sukhovetsky, zëvendëskomandant i Ushtrisë së 41-të, kishte rënë “heroikisht” në Ukrainë.
Burimet e “New York Times” nuk donin të specifikonin se sa gjeneralë rusë u vranë për shkak të informacionit të dhënë nga Uashingtoni në Kiev.
Ndihma e inteligjencës amerikane, të cilën Uashingtoni e ka konfirmuar, por pa elaboruar, i shtohet ndihmës ushtarake shumë miliardë dollarëshe që i ka dhënë ushtrisë ukrainase në një mënyrë shumë më transparente, duke përfshirë armët antitank, armë zjarri dhe municione të rënda, helikopterë dhe UAV.
“Ne duam ta shohim Rusinë të dobësuar në një masë të tillë që të mos mund të bëjë më gjëra të tilla si pushtimi i Ukrainës”, tha më 25 prill sekretari amerikan i Mbrojtjes Lloyd Austin.
