Është e jashtëzakonshme dhe e pabesueshme ajo që po realizon Luiza Gega nga gara në garë
Kampionia kuqezi ka dhuruar në orët e para të mëngjesit të sotëm paraqitjen më të mirë të të gjitha kohërave për Shqipërinë në një Kampionat Botëror, duke tejkaluar përsëri veten.
Gega u rendit e pesta në finalen e 3000 metrave me pengesa në evenimentin më madhor të atletikës që po mbahet në Oregon të Shteteve të Bashkuara të Amerikës.
Një garë fantastike nga Luiza, e cila për shumë vite me radhë është një garanci absolute në çdo event, por që gjatë këtij sezoni ka thyer çdo limit me paraqitjen e saj fenomenale.
Finalja e 3000 metrave me pengesa në Oregon rezultoi vërtetë spektakolare, teksa vendin e parë e zuri Norah Jeruto e Kazakistanit me kohën 8:52.02 (atlete e natyralizuar nga Kenia).
Në vend të dytë dhe të tretë u klasifikuan etiopianet Werkuha Gatachew (8:55.61) dhe Mekides Abebe (8:56.08), ndërsa e katërta Winfred Mutile Yavi (9:01.31) atlete keniane që përfaqëson Bahreinin.
Rezultate që tregojnë qartë se për të gjetuar një atlete që vrapon më shpejt se Luiza Gega, duhet vajtur vetëm në Kenia apo Etiopi.
ARTIN LLESHAJ – PANORAMASPORT.AL
