Nga Bujar Leskaj
𝟭𝟯 𝗾𝗲𝗿𝘀𝗵𝗼𝗿 𝟭𝟵𝟮𝟬 𝗻𝗱𝗲𝘀𝗵𝗸𝗶𝗺𝗶 𝗶 𝘁𝗿𝗮𝗱𝗵𝘁𝗶𝘀𝗲 𝗲𝘀𝗮𝗱𝗶𝘀𝘁𝗲!
Sot mbushen 102 vjet nga atentati simbol kundër tradhtisë, vrasja më e bujshme që ka ndodhur në historinë e shtetit shqiptar. Në 13 qershor 1920, ditën që do festonte 57 vjetorin e lindjes, Esad Pashë Toptani, teksa po dilte nga hotel “Continental” në Paris, u qëllua për vdekje nga studenti nga Libohova, Avni Rustemi, në emër të dashurisë së pakufishme për atdheun.
I implikuar direkt në 10 vrasje; i akuzuar për 20 vjedhje e grabitje prone; i akuzuar të paktën tre herë se kishte tradhtuar hapur Shqipërinë duke u dhuruar territore shqiptare në këmbim të parave e pushtetit personal armiqve permanentë të Shqipërisë dhe kombit shqiptar, vrasja e Esad Pashë Toptanit do të ishte rezultati logjik e i pritshëm i veprimtarisë së tij armiqësore.
Tradhtia e tij fillon me pengesat që i nxorri Shpalljes së Pavarësisë; dorëzimin e Shkodrës malazezëve në 1913, me minimin që i bërë qeverisë së Ismail Qemal Vlorës, me krijimin e qeverisë së Durrësit, pabesitë ndaj Princ Vidit në 6 muaj të qeverisje të tij në Shqipëri, etj, etj.
Atë të diel të 13 qershorit të vitit 1920, në vend të Avni Rustemit, i cili u nis nga Vlora me bekimin e patriotëve vlonjatë për të ndëshkuar tradhtinë, mund të ishte cilido nga patriotët shqiptarë, të cilët luftonin kundër tradhtisë së tij, kundër copëtimit të Shqipërisë dhe mbronin atdheun në Epopenë e Luftës së Vlorës. Pavarësisht interpretimeve vrasja e Esad Pashë Toptanit ishte ndëshkimi i djalërisë shqiptare për tradhtinë!
Tradhtia e tij ishte e pashembullt. Jo më kot në varrin e tij bëjnë homazhe qeveritarët serbë dhe nuk është e rastësishme që një rrugë në Beograd mban emrin e tij.
102 vite më parë Avni Rustemi, i preu krahët Serbisë, e cila nëpërmjet Esad Pashë Toptanit i kishte shtrirë aq shumë në Shqipëri.
Sot, 102 vite më vonë, esadistët e rinj të drejtuar nga kryetari i sektit në pushtet në miqësi të ngushtë me Vuçiç, tradhtojnë përsëri Shqipërinë dhe shqiptarët me projekte të reja me stof të vjetër titist, duke iu nënshtruar Beogradit me “Open Ballkan”!
