Avokati i Bashës përgënjeshtron Veliajn: Me keqardhje dëgjoj dhe lexoj sajesat e trasha. E vërteta është krejtësisht ndryshe

E para: çështja e pretenduar nga media nuk ka asnjë lidhje me seancën e sotme gjyqësore, ku objekti ishte landfilli i Sharrës. Pra mashtrohet për vetë objektin e padisë, çka është lehtësisht e verifikueshme.

E dyta: Në të gjitha seancat gjyqësore Veliaj është mbrojur duke pretenduar se nuk ka asnjë provë në lidhje me akuzat e ngritura prej tij dhe duke u justifikuar se ato janë vetëm opinione të marra nga mediat dhe që i ka përdorur për retorikë politike.

E treta: GJKKO ka vendosur një praktikë gjyqësore duke mos i cilësuar si vepra penale akuzat dhe shpifjet midis personave publikë dhe politikanëve duke i cilësuar ato si retorikë politike. Kjo praktikë është e paprecedent për çdo vend demokratik në botë, sepse lejon pa asnjë pasojë penale çdo akuzë pa fakte dhe shpifje që dëmton imazhin e personave publikë dhe politikë.

Gjithsesi ne do të ndjekim të gjithë hapat ligjorë deri në Gjykatën Europiane të të Drejtave të Njeriut pasi në asnjë precedent të kësaj Gjykate nuk ka raste të ngjashme ku akuza të tilla të konsiderohen retorikë politike dhe të kalojnë pa pasoja për shpifësit.