Fitoi zgjedhjet në Tuz, Nik Gjeloshaj: Shqiptarëve iu rikthye shpresa për një të ardhme në trojet e veta

Në një intervistë për gazetën “Evropë”, kryetari i sapozgjedhur i Komunës së Tuzit, Nik Gjeloshaj shprehet se shqiptarëve të Tuzit iu është rikthyer vetëbesimi dhe shpresa për një të ardhme në trojet e veta.

“Ne, u angazhuam me përkushtim që pasi fituam komunën e plotë, të administrojmë vetë me të mirat që disponojmë dhe bashkërisht me qytetarët e Tuzit dhe të Malësisë, të ndërtojmë një të ardhme më të mirë dhe më premtuese, sidomos për brezat e rinj. Të gjendur përball kësaj sfide, vepruam në drejtim të unifikimit të spektrit politik shqiptar në këto hapësira. Iniciuam bisedimet dhe ia arritëm që të bashkojmë forcat të bindur se kjo është rrugëtimi më i sigurt drejtë fitores së shumëpritur”, ka thënë Gjeloshaj.

Gjeloshaj ka folur edhe për sfidat që e presin në të ardhmen dhe ka pohuar se nuk do të kursehet në asnjë moment për të kontribuuar në ruajtjen dhe përçimin e vlerave kombëtare.

“Vullneti i dëshmuar në zgjedhjet lokale, dëshira për të instaluar një pushtet shqiptar në krye të komunës të bindur se kjo duhet të jetë e ardhmja jonë, janë sfidat që duhet përballur por, edhe për të realizuar pikësynimet tona programore. Aq më parë pasi përgjegjësia bie mbi ne, sepse ne ishim ata që iu qasëm punës me përkushtimin më të madh në sensibilizimin e opinionit shqiptar, jo vetëm në trevën e Tuzit dhe të Malësisë”, shprehet Gjeloshaj.