Më datën 29 prill zhvillohet në Berlin një takim me liderët e Ballkanit. Nismëtarë janë Franca dhe Gjermania. Ballkani është në qendër edhe të vizitës së ministrit gjerman të punëve të Jashtme Heiko Maas në Varshavë.
Kancelarja gjermane Angela Merkel dhe presidenti francez Emmanuel Macron kanë ftuar liderët e Ballkanit të marrin pjesë në Berlin në një konferencë. Në takimin e datës 29 prill do të priten të vijnë “përfaqësues të nivelit të lartë” të vendeve të Ballkanit Perëndimor, Kroacisë, Sllovenisë dhe Komisionit të BE-së, siç bëri të ditur një zëdhënës i qeverisë gjermane për agjencinë gjermane të lajmeve, dpa.
Sipas zëdhënësit, kancelarja gjermane dhe presidenti Macron, i japin një rëndësi të madhe stabilitetit dhe zhvillimit të rajonit. Në qendër të bisedës do të jenë sfidat e veçanta të rajonit, e sidomos në lidhje me marrëdhëniet mes Serbisë dhe Kosovës, citon zëdhënësin, agjencia e lajmeve, dpa.
Maas në Poloni
Ndërkohë edhe ministri gjerman i punëve të Jashtme, Heiko Maas, viziton të enjten Varshavën për të diskutuar për Ballkanin Perëndimor, bëhet e ditur nga Ministria gjermane e Punëve të Jashtme.
Polonia do të jetë organizatore e takimit të ardhshëm në kuadër të procesit të Berlinit, që do të mbahet më 5 korrik. Procesi i Berlinit synon me nisma në sektorin e Ekonomisë, Transportit dhe Rinisë që të luajë një rol të rëndësishëm në përmirësimin e marrëdhënieve bilaterale ndërmjet vendeve të Ballkanit Perëndimor.
