Juristi Çlirim Gjata kundër ushtrisë në Rinas: Ushtari nuk di të ruajë rendin, të vret!

Juristi i njohur, Çlirim Gjata, thotë se vendimi i Ministres së Mbrojtjes për të dislokuar ushtrinë në aeroportin e Rinasit është antikushtetues.

I ftuar në studion e lajmeve në RTV Ora, ai thotë se kjo është vetëm një tentativë e qeverisë për të tërhequr vëmendjen nga grabitja e 10 milion eurove.

Gjata: Aeroporti ka dalë jashtë kontrollit, është cënuar siguria kombëtare në objektin më të sigurt në Republikën e Shqipërisë. Se çfarë pune ka Ministrja e Mbrojtjes të nxjerrë ushtrinë, se është person politik. Nuk është e aftë qeveria dhe policia të kapë 4 veta që vodhën 10 milion euro për 5 minuta brenda në avion, brenda në aeroportin e Rinasit dhe ikën. Nuk po bën dot asgjë policia. Për të tërhequr vvëmendjen nxjerrin ushtrinë.

Po çfarë thotë Kushtetuta, të cilës Gjata i referohet?

Gjata: Të nxjerrësh ushtrinë duhet të ndjekësh Kushtetutën. Neni 173 thotë: “Në rast rreziku për rendin kushtetues dhe për sigurinë publike, Kuvendi, me kërkesë të Këshillit të Ministrave, mund të vendosë në një pjesë ose në të gjithë territorin e shtetit gjendjen e jashtëzakonshme, e cila zgjat për aq kohë sa vazhdon rreziku, por jo më shumë se 60 ditë”. Pra vetëm Kuvendi mund të vendosë, dini ndonjë propozim të Këshillit të Ministrave ju apo vendim të Kuvendit për të vendosur gjendjen e jashtëzakonshme në Rinas? Pika 2, “me vendosjen e gjendjes së jashtëzakonshme ndërhyrja e forcave të armatosura bëhet me vendim të Kuvendit dhe vetëm kur forcat e policisë nuk janë në gjendje të rivendosin rendin”.

Asnjë nuk ka ndodhur dhe thotë Ministrja e Mbrojtjes nuk ka nevojë për debat kushtetues, u bë edhe kryetare e Gjykatës Kushtetuese që ne se kemi fare.Kemi përdorim politik të ushtrisë për nevoja të qeverisë. Si mundet Kryeministri dhe Ministri i Mbrojtjes pa kërkuar leje te Presidenti, janë vartësit e tij.Nuk janë qeveri por sundimtarë, janë mësuar të sundojnë me kriminelët.

Gjata gjithashtu ngre problemin e mungesës së trajnimit të ushtarëve.

Gjata: Çfarë do bëjë ushtria, ushtari nuk di të ruajë rendin, ushtari të vret. Pasi të thotë dy herë ndal, edhe atë po ta tha, se të vret dhe të thotë pastaj ndal. Këtë punë ka ushtria, nuk ka lidhje me rendin. Policia është e trajnuar për rendin. Çfarë do bëjnë ata ushtarë në Rinas, u bë çfarë kishte për tu bërë.