Për Shqipërinë nuk hapen negociatat në muajin qershor, por një vendim mund të merret në shtator të 2019-ës. Media gjermane, Deutsche Welle raporton me burime nga CDU/CSU, se vendimi i këtij grupi, më i madhi në Bundestag, do të jepet në vjeshtë, pasi koha nga dalja e rekomandimit të Komisionit në fund të majit dhe samiti i Këshillit në qershor, nuk mjafton për të analizuar ecurinë e Shqipërisë dhe Maqedonisë së Veriut.
Qeveria e kryeministrit Edi Rama ka dështuar dy herë të hapë negociatat me Bashkimin Evropian, ndërkohë që edhe për këtë vit pritshmëritë janë të ulëta. Shtetet e BE-së kërkojnë më shumë rezultate në luftën kundër korrupsionit dhe krimit të organizuar, pavarësisht se përgëzohet puna në reformimin e gjyqësorit.
