Nëse sot do të hapësh dyert dhe t’u ofrosh azil qytetarëve shqiptarë pjesa dërrmuese e tyre është e sigurt që do të ikin. Tregues i këtij konkluzioni është numri i lartë i azilkërkuesve në Europë nga shqiptarët që krahasohen me sirianët e dalë nga lufta, numri i lartë i aplikantëve për lotarinë amerikane prej 367 mijë shqiptarët që kërkonin të largoheshin nga vendi si pasojë e varfërisë së madhe dhe çfarë është më kryesorja vrasjes së shpresës për një të ardhme të mirë. Veç kësaj çdo ditë ambasadat e vendeve perëndimore mësyhen nga mijëra shqiptarë në kërkim të një kontrate pune.
Pas ‘dështimit’ me Lotarinë Amerikane, duket se shumë qytetaret po shfrytëzojnë të gjitha mënyrat ligjore për t’u larguar dhe për të gjetur punë jashtë vendit.
Agjencia fotografike LSA, ka realizuar sot disa shkrepje pranë Ambasadës Gjermane në Shqipëri. Siç shihet nga fotot, shumë të rinj, por edhe mosha të ndryshme janë në radhë duke pritur me dosje aplikimet për punë në Gjermani.
Këto imazhe të kthejnë në kujtesë radhët e gjata në ambasada, kur shqiptarët prisnin për të marrë vizën për të udhëtuar jashtë.
