Presidenti i vendit, Ilir Meta, ka vendosur të bëjë propozimin e tretë për kryetar të Kontrollit të Lartë të Shtetit, pas refuzimit nga mazhoranca të Vitore Tushës dhe Bahri Shahirit.
Zëdhënësi i Presidentit, Tedi Blushi, njofton se Meta do t’i propozojë Kuvendit si kandidat për postin e kreut të KLSH Prof. Dok. Petraq Milon.
Kujtojmë që KLSH vijon prej disa muajsh të jetë pa kryetar, pas mbarimit të mandatit të ish-kreut Bujar Leskaj, i cili vijon të drejtojë ende këtë institucion, për shkak se Qeveria dhe Presidenca nuk kanë gjetur akoma gjuhën e përbashkët për emrin e ri.
Më parë, Kreu i Shtetit ka propozuar gjyqtaren Vitore Tusha, si dhe këshilltarin e tij, Bahri Shaqiri, për këtë post, por të dyja këto propozime janë rrëzuar nga mazhoranca. Mbetet për t’u parë nëse propozimi i tretë i Metës do të pranohet për të zgjidhur ngërçin te KLSH, i cili është një ndër institucionet kyçe të financave.
Njoftimi i plotë:
Zëdhënësi i Presidentit, z.Tedi Blushi bën me dije se:
Presidenti i Republikës Sh.T.Z Ilir Meta ka vendosur t’i propozojë Kuvendit të Republikës së Shqipërisë, si kandidat për postin e kryetarit të Kontrollit të Lartë të Shtetit, Prof. Dok. Petraq Milo.
Prof. Dok. Petraq Milo është një personalitet me një eksperiencë të jashtëzakonshme, brenda dhe jashtë vendit në fushën e financave, të auditit, të bankave dhe të ekonomisë në tërësi, gjithashtu me një kontribut të spikatur në drejtimin e institucioneve financiare, fiskale e bankare në Kosovë.
Përvoja e tij akademike, brenda dhe jashtë vendit, si edhe bashkëpunimi me institucionet më të rëndësishme financiare botërore dhe të Bashkimit Europian, janë një faktor i rëndësishëm për këtë zgjedhje.
Presidenti Meta falënderon edhe njëherë kandidatët e mëparshëm të propozuar prej Tij për postin e kryetarit të KLSH-së, znj.Vitore Tusha dhe z.Bahri Shaqiri, të cilët pranuan kandidimin e tyre, dhe është i bindur edhe sot në integritetin e lartë të tyre për drejtimin e KLSH.
Presidenti Meta duke qenë i bindur në drejtësinë e vendimit të Tij, pasi ka lexuar me shumë vëmendje sugjerimet e Kuvendit të Republikës së Shqipërisë lidhur me profilin profesional që duhet të ketë kandidati për kryetar i KLSH-së, nuk gjeti dot një kandidat më të përshtatshëm dhe me kaq eksperiencë të gjithanshme, si Prof. Dok. Petraq Milo, për të përmbushur me profesionalizëm dhe dinjitet këtë detyrë tepër të rëndësishme kushtetuese.
Presidenti Meta do t’ja dërgojë brenda ditës së sotme propozimin e tij Kuvendit, me besimin e plotë se do ta shqyrtojë këtë kandidaturë brenda këtij sesioni parlamentar, me objektivitet dhe përgjegjshmëri, që KLSH të funksionojë në mënyrë plotësisht kushtetuese e ligjore.
