Ish-ministri i Drejtësisë, Ylli Manjani, ka reaguar për aksionin kundër informalitetit, që ka nisur prej disa javësh dhe po bllokon të gjitha bizneset që kapen duke abuzuar. Manjani shkruan në “Facebook” se kryeministrit Edi Rama nuk i kërcet fare për konsumatorin apo për biznesin.
Ish-ministri ndalet te rasti i fundit i publikuar nga Rama, në të cilin shfaqej një hotel i bllokuar, duke u shprehur se ai iu fali tatime të kohës së shkuar bizneseve të mëdha në mënyrë anti-kushtetuese.
“Udhëheqësi i lavdishëm ka nxjerrë një foto hoteli të bllokuar, për medemek taksat e papaguara.
Është me vend të rikujtojmë se në fillim të këtij viti, në mënyrë haptazi anti kushtetuese ju fali tatime të kohës së shkuar bizneseve të mëdha, që i kishin arkëtuar atë para në kurriz të konsumatorëve prej vitesh.
Kush e dëmton më shumë konsumatorin një hotel që mezi bëhet gati të punojë një muaj në verë, apo një kompani e madhe shërbimesh që punon 365 ditë?!
Dhe flet për drejtësi e barazi para ligjit! Nuk është se nuk kupton atë që bën. E bën sepse nuk i kërcet fare as për konsumatorin e as për bisnesin”, shkruan Manjani.
