Gazeta e dytë më e madhe në Holandë, Algemeen Dagblad (AD) shkruan se Fetim Lato njihej gjerësisht si një mashtrues i nivelit të lartë. Për praktikat e tij zhvatëse, shkruan gazeta, Lato kishte falsifikuar edhe firmën e ish-ministrit të Punëve të Jashtme (2003-2007), Ben Bot.
Sipas mediave holandeze, 43-vjeçari u prezantohej donatorëve të ndryshëm si një politikan me influencë edhe në korridoret e Bashkimit Europian. Llogaritet se ai ka përfituar përmes skemave të mashtrimit deri në 7 milionë euro. Në disa foto në profilin e tij në Facebook, që tashmë janë hequr, Lato shihej teksa bënte foto me personalitete të ndryshme të BE, duke shkruan se ka arritur t’i bindë për kauzën e “Çamërisë”.
