Opozita e Bashkuar është në një zë teksa vlerëson pozitivisht rolin e Presidentit Ilir Meta në tentativat e tij për t’i dhënë fund krizës politike.
Ama sipas Dashamir Shehit, opozita nuk mund te shkonte në zgjedhjet e 13 tetorit të dekretuara nga Meta, për shkak se beteja e saj nuk ishte për të fituar disa muaj kohë, por për të larguar Ramën nga pushteti me zgjedhje të lira e të ndershme. Prandaj sipas kreut të LZHK, kjo datë nuk i përmbushte kërkesat e opozitës.
“Unë gjykoj që zt.Meta si kryetar i shtetit ka bërë maksimumin për të qetësuar ujëra, për t’i dhënë një zgjidhje palëve. Nuk mund t’i shkojmë shqiptarëve përballë ku kemi dalë 10 herë në bulevardin e Tiranës, kemi pretenduar që hajdutë dhe kriminelë kanë marrë gjithçka në këtë vend siç është e vërteta dhe sikur s’ka ndodhur asnjë gjë shkojmë e votojmë më datë 13 tetor kjo do të thotë se s’kemi thënë ndonjë gjë të vërtetë”, tha Shehi për News 24.
Sa i përket djegies së mandateve, Shehi ka një këndvështrim origjinal. Ai thotë se ky akt i opozitës pati anët e veta pozitive dhe negative.
Ndërsa kostot e krizës politike që po zgjat prej muajsh sipas Shehit, po i paguan Shqipëria. Sipas Dashamir Shehit, zgjidhja e krizës politike është një qeveria tranzitore me njerëz të ndershëm nga të dyja kampet, që do të mundësojë zgjedhje të lira e të ndershme.
Kryetari i Lëvizjes për Zhvillim Kombëtar foli edhe për aksionin e opozitës, që sipas tij do të vijojë me protesta mbarëpopullore, denoncime të vazhdueshme të elementeve kriminale në PS si dhe në dhënien e alternativës së re për shqiptarët.
