Ndërkohë që kryeministri i Shqipërisë, Edi Rama, u prit ditën e sotme mjaftë ftohtë në Bundestag dhe nga kancelarja Merkel, në mediat e huaja kanë nisur analizat për fatin e negociatave mes BE-së dhe Shqipërisë në muajin tetor.
Kështu, Damir Fras, korrespondentit për punët europiane të “Rrjetit Editorial Gjerman”, nëpërmjet një shkrimi të publikuar mesditën e sotme shkruan se, Bashkimi Europian, do t’i vendosë kushte të reja Shqipërisë për çeljen e negociatave për anëtarësim në Bashkimin Europian.
“Unioni kristandemokrat dhe SPD do të vonojnë çeljen e negociatave me Ballkanin. Ata nuk e shohin si të përshtatshme krizën dhe pasigurinë ligjore në Shqipëri”, e nis artikullin gazetari Fras.
Gjithashtu në shkrimin e tij ai thekson se Shqipëria duhet së pari, të reformojë ligjin zgjedhor dhe të vendosë në funksion sistemin gjyqësor. Këto kushte sipas Fras janë nga më kryesoret, përpara hapjes së kapitujve të parë të anëtarësimin me BE-në. Gazetari shton gjithashtu se një çështje që ka hapur diskutime është, edhe lidhja e gjyqësorit me krimin në Shqipëri.
“Shqipëria do të duhej të reformonte ligjin e saj zgjedhor dhe të garantonte “funksionimin” e gjyqësorit – dhe shumë më tepër. Ndër të tjera, “përparim i qëndrueshëm në luftën kundër korrupsionit dhe krimit të organizuar në të gjitha nivelet”. Mbi të gjitha, lidhjet mes politikës, gjyqësorit dhe mafies vazhdojnë të shkaktojnë diskutime”, shkruan mes të tjerave ai.
Ky kontekst do të sjellë vendosjen e kushteve të reja, të cilat do të shtyjnë akoma më shumë procesin e nisjes së negociatave.
Sa i përket samitit të tetorit gazetari nënvizon, se ndërsa Bundestagu duhet të marrë ende një vendim, Holanda dhe Franca janë shprehur kundër çeljes së negociatave.
“BE do të deklarojë gatishmërinë e saj për të negociuar me Shqipërinë për anëtarësim. Në fund të fundit, ato nuk do të fillojnë për disa vite”, mbyllet artikulli pesimist i tij.
