Të martën mbrëma një gazetar raportoi në policinë e Kosovës se ishte sulmuar nga Ministri në detyrë i Tregtisë dhe Industrisë, Endrit Shala. Gazetari i portalit “IndeksOnline”, Ensar Ramadani rrëfeu se ishte duke ndjekur një rast plagosjeje në QKUK kur ishte sulmuar fizikisht nga ana e ministrit sepse gazetari e kishte fotografuar. Ministri Shala e ka mohuar se kishte sulmuar gazetarin.
“Po të betohem, që nuk e kam sulmuar, ka qenë konflikt verbal, më shumë ka qenë keqkuptim që ka ndodh mes meje dhe tij sepse nuk e kam ditur që është gazetar”, – ishte njëra nga përgjigjet e Shalës për kallxo.com kur u pyet për rastin.
Ky portal ka siguruar pamjet e kamerave të sigurisë që tregojnë qartë sulmin fizik të ministrit Shala ndaj gazetarit. Në pamje mund të shihni se si rrjedh ngjarja. Ensar Ramadani po priste para Urgjencës në QKUK, kur sheh ministrin që po vjen në të njëjtin vend për shkak se i plagosuri ishte i afërm i tij.
Pasi pa se u fotografua, Shala i ishte drejtuar menjëherë gazetarit duke i rënë me shuplakë fytyrës. Në pamje shihen se janë të pranishëm edhe dy policë, njëri nga të cilët nuk ndërmerr asnjë veprim dhe tjetri mundohet të qetësojë ministrin duke e larguar nga aty.
Në lidhje me këtë rast, Prokurori Besim Kelmendi i cili është Koordinator në Zyrën e Kryeprokurorit të Shtetit për çështjet e sulmeve dhe kërcënimeve të gazetarëve tha se kishte nisur hetimet. Të enjten ministri Shala është pyetur nga policia për çështjen. Ndërkohë shoqatat e gazetarëve në Kosovë kanë kërkuar shkarkimin e ministrit Shala. ©LAPSI.al
