Operacioni Forca e Ligjit duket se është më shumë shfaqje. Mediat po merren më shumë me identitetin e spikeres së OFL, e cila shfaqet me syze të zeza në konferenca shtypi.
OFL zbuloi sot se bëhej fjalë për efektiven Eljes Breca, e diplomuar për psikologji në Firence, e cila ka rreth një vit që është pjesë e PR të OFL-së. E ndërsa jepte lajmin në “News24”, spikeri Edvin Parruca tërhoqi vëmendje me prezantimin që i bëri të resë, teksa jo vetëm i dha një ton zërit të tij, por hoqi edhe syzet me habi, duke ironizuar kështu aksionet e OFL.
“Jo vetëm për elementet karakteristike si syzet e zeza që mban para kamerave, por edhe për fizikun e saj. “News24” zbulon kush është zëdhënësja e operacioni ‘Forca e Ligjit’”, thotë gazetari Parruca, teksa heq syzet e tij.
Ndërkohë në një koment, edhe analisti Artur Zheji ironizon aksionin.
“Kontrasti piktoresk, i të verdhës verbuese, të policeve bionde, me uniformën blu të thellë dhe syzet me xhama të mëdhenj dhe të zi, është pra një kontrast i goditur. Porse, vetëm një kontrast i gjetur filmik dhe televiziv, por duhet me pa më tej. Urime pra OFL-së, superfigurante! Mjerë çunat e krimit, duket se atyre, u kanë hyrë dridhmat në bark…,” shkruan ai.
