Kryeministri Rama u takua ditën e sotme me krerët e komuniteteve fetare, ku në fokus ishte situata e krijuar në vend nga konfirmimi i dy rasteve të para me koronavirus. Rama iu ka dhënë disa porosi krerëve të komuniteteve fetare për t’i përcjellë tek përfaqësuesit e tjerë për marrjen e masave.
“Kjo është një epidemi që prek ata që janë më të moshuar e kanë sëmundje kronike. Nuk kërcënon me jetën moshat e tjera dhe që nuk kanë probleme me shëndetin. Sidomos për këta që janë të dyshuar, dhe sidomos për ato momente kur ka një ditë të posaçme në një kishë apo në një xhami kur mblidhen shumë njerëz, aty duhet pasur kujdes që t’i përcillen të gjitha këto rregullat që e thyejnë ritualin në një farë mënyre sepse puthja e dorës, përqafimi, apo qëndrimi shumë ngjitur gjatë kohës që falen njerëzit në xhami, janë disa gjëra që janë mirë të transmetohen dhe këto mund t’i transmetoni ju sepse s’mund t’i thotë qeveria. Dhe nga ana e sensibilizimit disa rregulla të thjeshta. Është një virus i panjohur, por jo murtaja”, deklaroi Rama.
Ai tha se është një fazë ku duhet kujdes.
“Frika është gjëja e gabuar por kujdesi është gjëja e duhur. Do ishte mirë disa mesazhe të dedikuara publikut”, tha Rama.
Në fund teksa i ka përcjellë kryeministri nuk iu ka dhënë dorën asnjërit prej klerikëve e madje iu ka sugjeruar të mos qëndrojnë afër njeri-tjetrit.
“Nuk duhet të prekeni se jepni shembullin e gabuar. Mos t’i japim dorën njeri-tjetrit, faleminderit shumë”, tha Rama.
