Pasi ministri i Brendshëm Sandër Lleshaj njoftoi tre ditë më parë se Prefekti i Shkodrës, Çesk Millja është shkarkuar nga detyra, ky i fundit është paraqitur sot për të dorëzuar detyrë.
Në një prononcim për mediat të cilin ai nuk e kishte parashikuar, pasi siç i thotë gazetarëve“më dolët përpara”, ish-prefekti tha se nuk dëshironte të komentonte vendimin për shkarkimin e tij nga detyra.
I pyetur për motivacionin se përse ishte shkarkuar ai tha:
“Lirohesh nga detyra, kjo është në vendimin e kryeministrisë”
Megjithatë ministri Lleshaj kur komunikoi shkarkimin e prefektit ishte më specifik sa i përket motivacionit.
“Këto situata kërkojnë iniciativë dhe vendimmarje. Hezitimi për të mos vepruar sjell pasoja. Mungesa e vendimmarrjes është arsyeja kryesore për lirimin detyra të prefektit Millja” tha Lleshaj.
Nuk dihet se përse, ish-prefekti i Shkodrës tashmë, nuk e ka zbuluar motivacionin se përse është shkarkuar pasi një gjë e tillë është e detyrueshme të argumentohet nga institucionet megjithëse në rastin konkret Millja nuk kishte problem diçka të tillë.
I buzëqeshur, ai deklaroi se kishte dorëzuar detyrën, kishte falenderuar kolegët, dhe bëri apel për të punuar sa më shumë në marrjen e masave kundër koronavirusit.
