Detaje të reja mësohen në lidhje me vrasjen e 27-vjeçarit Gjin Ndoji, i cili u gjet pa jetë me një plumb në kokë, mëngjesin e sotëm në një fshat të Vaut të Dejës.
Detajet e reja i ka siguruar për “BalkanWeb” gazetarja Dorjana Bezat.
Mësohet se viktima ishte person me precedent të theksuar kriminal në fushën e krimeve ndaj personit dhe trafiqeve të paligjshme.
Policia thotë se në vendngjarje janë gjetur 4 gëzhoja kallashnikovi, ndërsa trupi i 27-vjeçarit është gjetur tre metra jashtë mjetit “BMW” që e kishte marrë me qira.
Rreth një kilometër larg skenës së krimit policia gjeti edhe një mjet të djegur, duke dyshuar se mund të jetë mjeti që përdorën autorët e atentatit.
Të njejtat burime konfirmojnë se 27 vjeçari kishte probleme gjakmarrje por grupi hetimor nisur nga dinamika e ngjarjes dhe pecedentet kriminal që ka viktima nuk përjashtojnë as pistat e tjera.
Informacion paraprak
Më datë 09.08.2020, rreth orës 05:55, në fshatin Shkjezë, Njësia Administrative Bushat, në rrugë, është konstatuar i pajetë, shtetasi Gj. B., 27 vjeç, banues në lagjen “1 Maji”, Shkodër.
Nga veprimet e para hetimore dyshohet se ka humbur jetën si pasojë e përdorimit të armës së zjarrit.
Grupi hetimor nën drejtimin e Prokurorisë vijon punën për sqarimin e rrethanave të ngjarjes.
