Duke filluar nga sot, të gjithë qytetarët që u ka skaduar afati i përdorimit të pasaportës biometrike mund të riaplikojnë për pasaporta me procedurë të thjeshtuar, pa formular Policie.
Tashmë ata nuk kanë nevojë të shpenzojnë kohë pranë Policisë për të plotësuar formularë, por mund të paraqiten menjëherë pranë zyrave të aplikimit. Këtë njoftim e dha vetë ministri i Brendshëm, Sandër Lleshaj, i cili tha se kjo është një risi që do të kursejë kohë e shpenzime për shtetasit shqiptarë, që tashmë e kanë shumë më të thjeshtë procedurën e ripajisjes me dokumente biometrike.
Ministri Lleshaj u shpreh se Ministria e Brendshme ofron tashmë një gamë të gjerë shërbimesh online dhe se këtë angazhim do ta rrisë e thellojë edhe në të ardhmen. “Viti 2020 ka qenë një vit i rëndësishëm sa i përket shtimit të gamës së shërbimeve për qytetarët, të cilat janë spostuar kryesisht në fushën e shërbimeve dixhitale. Dhe kjo ka lehtësuar jashtëzakonisht shumë barrën e qytetarëve, të cilët janë detyruar prej vitesh të harxhojnë orë të tëra pranë sporteleve, ndërkohë që kjo kohë tani u mbetet në dispozicion atyre”, tha Lleshaj.
APLIKIMI PER PASAPORTA
Ministria e Brendshme ka ofruar një numër të madh shërbimesh online dhe dje ministri Sandër Lleshaj prezantoi një tjetër risi, një tjetër lehtësim të barrës për qytetarët që ka të bëjë me aplikimin për pasaporta udhëtimi. “Në ndryshim nga praktika e deritanishme, tashmë për riaplikimin janë hequr detyrimet për t’u paraqitur pranë Policisë, për të bërë aplikim dhe për të plotësuar formularë pranë Policisë së Shtetit. Duke filluar nga data 1 tetor, qytetarët që duhet të riaplikojnë për pasaportë u mjafton vetëm të paraqiten pranë sportelit përkatës të aplikimeve, pas përcaktimit të orarit të aplikimit që bëhet online. Është fakt i ditur që pandemia e gjatë e këtij viti, së cilës i ka paraprirë edhe situata e tërmetit, e ka detyruar qeverinë që të shtyjë afatin e vlefshmërisë për kartat apo pasaportat e skaduara. Por tashmë koha ka ardhur që qytetarët të nxitojnë për të aplikuar pranë zyrave të aplikimit, me qëllim që të pajisen me karta identiteti dhe me pasaporta”, tha Lleshaj.
Ministri i Brendshëm u ndal dje kryesisht te kartat e identitetit, për të cilat ai u bëri thirrje të fortë qytetarëve, për arsye se një numër i madh shërbimesh lidhen me kartat, me vlefshmërinë e tyre, ndërkohë që edhe afrimi i zgjedhjeve detyron qytetarët të pajisen me këto karta, me qëllim që t’u mundësohet edhe zgjedhja konform rregullave, për faktin që duke pasur edhe identifikim elektronik, do të duhet që qytetarët të kenë në dorë karta të vlefshme. “Kështu që vlen thirrja për të nxituar, zyrat janë të pajisura, janë funksionale dhe mirëpresin të gjithë qytetarët për të kryer këtë detyrim pranë tyre”, u shpreh Lleshaj.
Karta pa afat skadence për ata që kanë mbushur 75 vjeç
Ministri përmendi gjatë prononcimit për pasaportat biometrike edhe faktin që shtetasit, të cilët kanë mbushur moshën 75 vjeç, marrin karta identiteti pa afat skadence. Ndërkohë, ai bëri thirrje për të gjithë shtetasit që u ka skaduar ose që do t’u skadojë karta e identitetit gjatë këtij viti, të aplikojnë në kohë për t’u ripajisur me këtë dokument shumë të rëndësishëm, përmes të cilit merret çdo shërbim tjetër pranë zyrave të administratës shtetërore. “Një risi tjetër, e cila ka kohë që ka ndodhur, lidhet me faktin që për qytetarët që aplikojnë për karta identiteti dhe që janë mbi moshën 75 vjeç, ajo lëshohet pa afat vlefshmërie, që do të thotë se kushdo që ka kaluar moshën 75 vjeç dhe aplikon për të marrë një kartë identiteti, ajo lëshohet pa afat skadence, që është po ashtu një lehtësi dhe shërbim i ri në favor të qytetarëve”, u shpreh dje Lleshaj.
