Presidentja në detyrë e Kosovës, Vjosa Osmani ka njoftuar se është prekur nga COVID-19. Osmani shkruan se ka patur kontakt me persona të afërt që kanë rezultuar pozitiv, për këtë arsye i është nënshtruar tamponit.
Presidentja në detyrë, njëherësh dhe kryetarja e Kuvendit, njofton se do kurohet dhe do punojë nga shtëpia këto dy javë.
“Pasi disa të afërm me të cilët kisha kontakt rezultuan pozitivë në testin për Covid-19, u testova në IKSHKP dhe pak më parë u njoftova se edhe unë kam rezultuar pozitiv.
Në dy javët e ardhshme do të punoj nga shtëpia, duke u kujdesur që secili dokument a vendim që kërkon shqyrtim e vendimmarrje dhe që lidhet me përgjegjësitë e mia në të dy funksionet shtetërore që i ushtroj, të trajtohet në kohë. Po ashtu, një numër takimesh do t’i vazhdoj nëpërmjet platformave elektronike.
Përkundër kujdesit maksimal, po shihet që këto ditë virusi është kudo, më i përhapur se kurrë më parë, njëjtë i rrezikshëm si çdoherë. Prandaj, uroj që ta tejkalojmë këtë sfidë bashkërisht, duke mos e injoruar rrezikun nga virusi dhe kujdesin që duhet treguar.
Mirëmbetshi e shëndet të gjithëve!”, thekson Vjosa Osmani.
