Sekretari i PD për zgjedhjet, Ivi Kaso ka folur për vendimin e fundit të KAS që i jep mundësi koalicionit të demokratëve me aletatët të garojnë me listën e plotë të kandidatëve.
Kaso thotë se kjo është beteja e parë e fituar, pasi më e madhja është ajo e fitores më 25 prill.
Sipas tij, vendimi i parë i KQZ ishte i diktuar nga interesat e mazhorancës duke vendosur rregulla të reja.
Tashmë për Kason edhe pse koalicioni i PD ka më shumë kandidatë në zgjedhje, aplikimi i drejtë i listave garanton barazi për të gjitha partitë.
DEKLARATË E PARTISË DEMOKRATIKE, SEKRETAR PËR ÇËSHTJET ZGJEDHORE IVI KASO
Vendimi i sotëm i Komisionit të Apelimit konfirmoi qendrimin e drejtē të Partisë Demokratike pēr listën e përfaqësimit në zgjedhjet politike të 25 Prillit.
Si gjithmonë, ne jemi në anën e ligjit dhe vendosim të parin interesin publik, përfaqësimin sa më të plotë dhe dinjitoz të të gjitha shtresave të shoqërisë.
Vendimi i mëparshëm i KQZ-së për të mos regjistruar listat e plota të koalicionit ishte një vendim i padrejtë dhe i paligjshëm, diktuar nga interesat politike të shumicës.
Pas ndryshimit të rregullave të lojës në mënyrë të njëanshme, shumica synoi të vendoste rregulla të tjera, të cilat parandaluan përfaqësimin e plotë dhe të drejtë të të gjitha partive përbërëse të koalicionit tonë.
Tani, koalicioni ynë po konkuron në potencialin e tij të plotë, njerëzor dhe programatik. Por përfaqësimi i koalicionit PD në zgjedhjet e 25 Prillit me listat e plota është vetëm beteja e parë e fituar.
Beteja më e madhe është ajo e ditës së zgjedhjeve, 25 Prill.
Qytetarët e dinë që këto zgjedhje nuk janë për Ramën apo Bashën: Këto zgjedhje janë për të ardhmen e fëmijëve dhe familjeve të tyre. Kēto zgjedhje vendosin nēse Shqipëria do tē perparojē drejt Bashkimit Evropian.
Njerëzit e dinë që kjo nuk mund të bëhet nga Edi Rama, i cili dështoi për 8 vjet dhe na la mbrapa të gjitha vendeve tē tjera. Njerëzit do të votojnë për Lulzim Bashën, misioni i të cilit është të ndërtojë në Shqipëri një qeveri evropiane, të përgjegjshme dhe me një fytyrë njerëzore.
Asgjë nuk do të na ndalojë të sjellim ndryshimin në Shqipëri me njerëzit tanë të mrekullueshëm, të cilët kanë nevojë dhe e duan kaq shumë ndryshimin! Ne do ta bëjmë të mundur këtë në 25 Prill me ndihmën e të gjithë shqiptarëve.
