Adhuruesit e muzikës në Barcelonë u përqafuan, vallëzuan dhe kënduan së bashku në një koncert rrok të shtunën në mbrëmje pasi bënë teste të shpejta të COVID-19 për një eksperiment që mund të ringjallë industrinë e muzikës live në Spanjë dhe më gjerë.
Rreth 5,000 spektatorë në shfaqje për grupin spanjoll Love of Lesbian duhej të vinin maska, por distanca shoqërore nuk iu kërkohej në arenën Palau Sant Jordi.
“Ishte spektakolare. Ne ndiheshim të mbrojtur gjithë kohën. Ishim në rreshtin e parë dhe ishte diçka që na kishte munguar shumë,” tha publicisti Salvador, 29 vjeç, pas shfaqjes. “Ne jemi shumë krenarë që kemi pasur mundësinë të marrim pjesë në këtë. Shpresojmë se do të jetë i pari nga shumë.”
Në pamjet që dukeshin surreale pas një viti distancimi shoqëror, spektatorët vallëzuan afër njëri-tjetrit, por ai “det” fytyrash të mbuluara me maska tregoi se gjërat nuk ishin normalizuar normalisht.
Kontrollet shëndetësore në hyrje vonuan fillimin e koncertit, por nuk mund ta zbusin shpirtin e festës.
“Mirësevini në një nga koncertet më emocionuese të jetës sonë!” i tha këngëtari kryesor Santi Balmes, turmës mes brohoritjesh.
Koncerti i miratuar nga qeveria shërbeu si një eksperiment nëse aktivitete të ngjashme do të mund të organizohen përsëri.
“Do të jetë më e sigurt të jesh në Palau Sant Jordi sesa të ecësh në rrugë,” i tha bashkëorganizatori i koncertit Jordi Herreruela, agjencisë Reuters të shtunën.
Testimi para koncertit në tre pika të Barcelonës u krye nga 80 infermierë të veshur me pajisje të plota mbrojtëse personale. Disa njerëz zmbrapseshin kur infermierët u lagnin hundët.
Deri në mesditë, tre nga 2,400 persona të skanuar tashmë ishin testuar pozitivisht dhe një kishte pasur kontakt me një rast pozitiv, tha Dr. Josep Maria Libre, një mjek që mbikëqyri testimin. Ata nuk ishin në gjendje të merrnin pjesë në koncert dhe do t’u bëhej rimbursim.
Të pranishmit morën rezultatet e testit të antigjenit në 10 deri në 15 minuta përmes një aplikacioni në telefonët e tyre. Testi dhe një maskë u përfshinë në çmimin e biletës.
“Unë besoj se sot kemi bërë një gjë një realitet, t’i tregojmë botës se kultura është e sigurt”, tha Ramon, një tifoz 49-vjeçar.
