Kreu i Partisë Demokratike Lulzim Basha ndodhet sot në Fier. Basha është pritur nga mijëra mbështetës, ndërsa para tyre u shpreh se erën e ndryshimit e ndjen kudo. Gjithashtu, kreu i demokratëve u bëri thirrje simpatizantëve të ruajnë distancën, megjithëse kjo duket e pamundur.
Teksa takoi qytetarët, Basha hipi mbi makinë dhe u premtoi qytetarëve se dita e ndryshimit është duke ardhur.
“Më keni falur emocione të jashtëzakonshme, por asnjëherë si sot me këtë pritje të mrekullueshme. Era e ndryshimit po fryn kudo në Shqipëri. E shoh në sytë e mbarë shqiptarëve, e dëgjoj në zërin tuaj. Era pozitive e ndryshimit do të sjellë mirëqënien. Ju falënderoj nga zemra. E di se kur era e ndryshimit fryn, 25 prilli do të jetë një ditë e mirë për çdo shqiptar. Dua t’ju lus të vazhdojmë të respektojmë kushtet në të cilat ndodh kjo fushatë, të mbajmë maskën dhe distancën. Të çojmë edhe më lart frymën e shpresës dhe ndryshimit. Bashkë do të fitojmë. Shqipëria do të fitojë,” tha Basha.
Pas mesazhit për mbështetësit, Basha ka vijuar me takime me qytetarë dhe biznese të vegjël. Kryedemokrati planifikoi të vizitonte Fierin ditën e djeshme, por e anuloi për shkak të ndarjes nga jeta të deputetit socialist Bashkim Fino.
