Një grup prej 13 eurodeputetësh i ka nisur dje një letër Komisionit Europian dhe Agjencisë së Sigurisë së Aviacionit të Bashkimit Europian (EASA), për situatën e krijuar në Shqipëri me kontrollorët e “Albcontrol”.
Në letrën e tyre, eurodeputetët shprehen se ndihen të shqetësuar për situatën që po ndodh me kontrollorët e trafikut ajror, ndërsa thonë se qeveria shqiptare ka tentuar që ta zgjidhë situatën në kundërshtim me praktikat ndërkombëtare, ndërsa shton se zëvendësimi i kontrollorëve shqiptarë me të huaj ka vënë në rrezik sigurinë e fluturimeve në hapësirën shqiptare.
“Ne jemi jashtëzakonisht të shqetësuar për një situatë në Shqipëri, që është sjellë në vëmendjen tonë, që përfshin arrestimin e tre kontrollorëve të trafikut ajror. Qeveria shqiptare është përpjekur të zgjidhë këtë situatë në kundërshtim me praktikat europiane, me dërgimin e ushtrisë, marrjen e kontrollorëve të huaj, burgosjen e disa prej kontrollorëve dhe kërcënimin e tyre se do të humbisnin vendin e punës. Përballë kësaj, kontrollorët shqiptarë që janë kthyer në punë e kanë bërë këtë nën një stres të jashtëzakonshëm shtesë, një situatë e qartë në kundërshtim me rregulloret europiane të sigurisë të vendosura.
Ministria shqiptare e Transportit ka lejuar zëvendësimin e kontrolluesve të trafikut ajror të burgosur me personel të paautorizuar dhe të pakualifikuar, duke vendosur sigurinë dhe stabilitetin e shërbimeve të trafikut ajror mbi Shqipërinë në një rrezik të madh, për të mos përmendur rrjetin në tërësi. Kjo situatë është qartë në shkelje të shtojcës 1 të Konventës së Çikagos dhe Europës mbi rregulloret e trajnimit.
Trajnimi për kontrollimin e hapësirës ajrore zakonisht zgjat nga një deri në dy vjet. Është e konfirmuar se qeveria shqiptare ka ftuar kontrolluesit turq të vijnë dhe të marrin kontrollin e hapësirës ajrore. Kjo ka një ndikim të rëndësishëm në sigurinë e hapësirës ajrore në Juglindje dhe pilotët e linjave ajrore duhet të kenë shumë kujdes kur kalojnë hapësirën ajrore shqiptare”, thuhet në letër.
Në letër kërkohet një reagim urgjent nga Komisioni Europian, ku i kërkon të ftojë qeverinë shqiptare që të reflektojë dhe të zgjidhë këtë konflikt.
“Kjo situatë kërkon një reagim të fortë nga Komisioni Europian dhe EASA. Ne i bëjmë thirrje Komisionit Europian dhe EASA-së të vendosin procedura urgjente të sigurisë, në mënyrë që të mos ketë ndërprerje të fluturimeve brenda hapësirës ajrore përreth Shqipërisë. Ne e nxisim Komisionin Europian të vendosë kontakte me autoritetet shqiptare dhe t’i ftojë ata që të kthejnë pas veprimet e tyre, si dhe të përfshihen në një dialog me punëtorët, për t’iu siguruar atyre një mjedis të sigurt pune dhe një hapësirë të sigurt ajrore. Ne e nxisim Komisionin Europian të kujtojë qeverinë shqiptare për detyrimet e saj si pjesë e procesit të integrimit në përputhje me rregulloret e BE-së”, thuhet në letrën e nënshkruar nga 13 eurodeputetë.
