Është lëshuar urdhër ndalimi ndaj 22-vjeçares Rexhina Çelhaka, e cila është drejtuesja e mjetit tip “Land Rover”, që dyshohet se i ka prerë rrugën furgonit në ‘Qafë Muzinë’ ditën e djeshme, duke shkaktuar aksidentin tragjik me 5 viktima.
Çelhaka ka qenë duke udhëtuar së bashku me 2 shtetase të tjera italiane në automjet, të cilat po ashtu ndodhen në spital, jashtë rrezikut për jetën.
“Manovra e pastudiuar mirë e 22-vjeçares, ka shkaktuar aksidentin tragjik me 5 viktima, pasi furgoni për t’iu shmangur përplasjes ka dalë nga rruga dhe ka përfunduar 20 metra në humnerë. E reja ka pësuar shembje në krah dhe ndodhet në spitalin Rajonal të Gjirokastrës dhe është jashtë rrezikut për jetën”, tha në rrjetet sociale Harta Digitale e Aksidenteve Rrugore.
Nga ana tjetër vajzat italiane në dëshminë e tyre deklarojnë se ishte furgoni ai që mori kthesën gjerë dhe shoferja e foristradës frenoi për të shmangur përplasjen, ndërsa makina rrëshqiti nga lagështia.
“Furgoni e mori kthesën gjerë dhe shoqja jonë (drejtuesja e ‘Range Rover’ frenoi për të shmangur përplasjen, ndërsa makina rrëshqiti nga lagështia.”.
