BRITANI E MADHE/Artistja shqiptare me famë botërore, Rita Ora ka vizituar shkollën e saj fillore në Londër. Ajo është fotografuar e buzëqeshur pranë një pllake, e cila është vendosur për nder të saj në murin e shkollës, shkruan The Sun.
Përveç emrit të saj me shkronja të mëdha, në pllakë shkruhej edhe: Unë jam refugjate. Këngëtarja dhe aktorja iku nga lufta në Kosovë dhe studioi këtu pasi mbërriti në Britaninë e Madhe në vitin 1991”.
Rita e cila sot është 30 vjeçe ka një karrierë të suksesshme mbarë globale si këngëtare, aktore dhe modele. Ajo shkrepi disa fotografi aty pranë pllakës në shkollën fillore “St Cuthbert” në Londrën Perëndimore.
Anëtarja e jurisë së spektakleve “The Voice Australia” dhe “The Masked Singer” më pas vizitoi shkollën “Sylvia Young Theatre School”, në të cilën përfundoi shkollimin e mesëm.
Rita kohëve të fundit është rikthyer në Mbretërinë e Bashkuar Nga Los Angelesi, për të rifilluar punën si panliste në spektaklin “The masked Singer”.
Ora shquhet si një nga muzikantet më të njohura në botë, e cila numëron plot 13 këngë nga karriera e saj që kanë arritur të jenë gjithmonë në top 10 këngët më të mira në Mbretërinë e Bashkuar – çka është një rekord i një artisteje femër britanike.
