Banorët e 5 Majit, Laprakës, Paskuqanit, Kodrës së Priftit dhe Kombinatit e kanë zhvendosur protestën e tyre para Kryeministrisë.
Pronat e tyre preken nga projektet e rindërtimit dhe Unazës së Madhe. Ata kërkojnë shpronësim të drejtë për pronat e tyre.
Banorët e katër zonave të Tiranës e kanë zhvendosur protestën e tyre përpara godinës së Kryeministrisë, mesditën e kësaj të diele. Ata kundërshtojnë prishjen e banesave të tyre.
Një prej banorëve të lagjes “5 Maj” thonë se ata janë pronarë dhe jo zaptues. Ai shprehet se prej muajsh kërkojnë sqarim nga autoritetet për fatin e pronave të tyre.
Banori thekson se nuk janë kundër zhvillimit të zonës, por nuk mund të trajtohen me akt normativ. Gjithashtu, ai paralajmëron përshkallëzim të protestës. “Kemi mbi 20 vite që jetojmë atu dhe me kod civil jemi pronarë dhe jo zaptues. Kryetari i bashkisë tha mbrëmë që janë zaptues, jetojnë nëpër kasolle. Unë nuk e prisja që ky kryetar ka marrë votat e këtyre banorëve. Kemi 4 muaj që protestojmë për pronën. Nuk është dëgjuar fjala jonë. Kemi protestuar për të drejtën e pronës. I kemi kërkuar që të na japin një dëgjesë publike, një sqarim. Realisht nuk na është dhënë asnjë sqarim. Kam 17 vite që jam në proces legalizimi. Kam 35 vjet në atë zonë, qëkur kam lindur. Çfarë qeverish kanë ardhur dhe kanë ikur vetëm premtime. Nuk duam premtime, por gjëra konkrete. Nuk jemi kundër zhvillimit të asaj zone, por mos na trajto me akt normativ për fatkeqësi natyrore. Ne të na trajtojnë si pronarë. Unë personalisht dal në ms të rrugës nesër për një arsye. VKM nuk është ligj. I bëj thirrje Erion Veliaj sot je ti nesër vjen dikush tjetër. në datë 22 dhe banesa prishet në orën 10. Në date 22 vajza ime ka ditëlindjen dhe mua më prishet shtëpia. Ta garantoj që do të ketë protestat dhunshme, por edhe greva urie”, thotë ai.
Thirrjeve të prindërve të tyre iu janë bashkuar dhe fëmijët që me altoparlant i kanë kërkuar kryeministrit Edi Rama të mos prishë shtëpitë e tyre.
“Xhaxhi Edi të lutem mos na i prish shtëpitë, mezi i kemi bërë. Ne nuk kemi më shtëpi të tjera. Gjithçka mund të ndodhë”, tha një fëmijë dhe të tjerë iu bashkuan thirrjes me zë ndaj kryeministrit. Në anën tjetër prindërit e tyre kërkonin drejtësi.
Protestuesit kanë paralajmëruar dhe grevë urie nëse nuk marrin zgjidhje.
“Po shohim si opsion futjen në grevë urie para kryeministrisë sepse shumë shpejt do fillojë shembja e banesave. janë shënuar me kryq. Është e patolerueshme, duam zgjidhje. Atëherë kur të marrim zgjidhje ju mund të vijoni punën. Po shohim si opsion futjen në grevë urie deri në vetëflijim. Në të gjithë Shqipërinë ka projekte, ka çështje prone, ka konflikt për pronën. I ftoj të gjithë të na bashkohen neve. Çdo person që ka konflikt për pronën, të kërkojmë një nismë ligjore që të marrë fund njëherë e mirë çështja e pronës”, deklaruan banorët. Ata falënderuan dhe policinë e Shtetit që ishte në gatishmëri pranë protestuesve.
