E veshur me një kostum të bardhë, kryetarja e Dhomës së Përfaqësuesve të SHBA, Nancy Pelosi mbërriti në parlamentin e Tajvanit, nga ku bëri një adresim dhe dha një mesazh kur e përshkroi Tajvanin si “një nga shoqëritë më të lira në botë”.
Teksa u prit nga nënkryetari i parlamentit, Tsai Chi-Chang, Pelosi tha se donte të rriste shkëmbimet parlamentare midis SHBA-së dhe Tajvanit.
Disa qytetarë u mblodhën në sheshin para Parlamentit në mbështetje të vizitës së ligjvënëses amerikane, por kishte edhe nga ata që kishin dalë për të kundërshtuar vizitën e saj.
Gjatë fjalëve të saj në parlamentin e Tajvanit, Pelosi iu referua vizitës së saj në sheshin Tiananmen të Pekinit dy vjet pas masakrës së vitit 1989 të demonstruesve studentë atje.
“Ne ishim atje dhe bëmë një deklaratë mbi të drejtat e njeriut – vizita jonë kishte të bënte me çështjet e sigurisë… me kalimin e viteve ka qenë gjithmonë për sigurinë, ekonominë dhe qeverisjen,” i tha ajo nënkryetarit të parlamentit tajvanez.
Më pas Kryetarja e Dhomës së Përfaqësuesve të SHBA-së pati takimin dhe me Presidenten e Tajvanit Tsai Ing-wen.
Presidentja Tsai e falënderoi Pelosin për vëmendjen dhe “mbështetjen e palëkundur” për Tajvanin.
“Kryetarja Pelosi ka lidhje të gjata dhe të thella me Tajvanin… Zonja Kryetare, më duhet t’ju shpreh mirënjohjen time,” tha ajo.
Pasi falënderoi Pelosin dhe e quajti atë “një nga miqtë më të përkushtuar të Tajvanit”, Presidentja Tsai iu referua pushtimit rus të Ukrainës në fillim të këtij viti.
Ajo tha se pushtimi rus i Ukrainës e ka bërë sigurinë në ngushticën e Tajvanit një tjetër fokus të vëmendjes mbarëbotërore.
“Agresionet kundër Tajvanit demokratik do të kishin një ndikim të jashtëzakonshëm në sigurinë e të gjithë Indo-Paqësorit,” tha ajo.
“Tajvani nuk do të tërhiqet. Ne do të mbështesim me vendosmëri sovranitetin tonë kombëtar dhe do të vazhdojmë të mbajmë vijën e mbrojtjes për sigurinë tonë globale,” shtoi Presidentja e Tajvanit.
Ushtria e Tajvanit rrit nivelin e vigjilencës
Pak përpara se zonja Pelosi të takohej me Presidenten Tsai, kabineti i Tajvanit njoftoi se ushtria e ishullit kishte rritur nivelin e vigjilencës.
Autoritetet miratuan plane për të “garantuar sigurinë dhe stabilitetin rreth ishullit” – një përgjigje ndaj njoftimit të Kinës për të mbajtur tre ditë stërvitje ushtarake që rrethojnë ishullin duke filluar të enjten.
Kabineti Tajvanez shtoi se qytetarët duhet të ndihen të qetësuar në sigurinë e tyre.
Ndërkohë Kina ka rritur hakmarrjen e saj ekonomike ndaj vizitës së Pelosit – duke njoftuar një sërë ndalimesh dhe sanksionesh ndaj importeve dhe bizneseve tajvaneze këtë mëngjes.
Në një konferencë shtypi, Pelosi hodhi poshtë polemikat rreth vizitës së saj në Kinë dhe tha se Pekini nuk ishte përgjigjur në mënyrë të ngjashme kur ligjvënësit e tjerë amerikanë e vizituan në fillim të këtij viti.
“Unë mendoj se ata bënë një bujë të madhe sepse unë jam kryetare, nuk e di nëse kjo është arsyeja apo një justifikim. Sepse ata nuk thanë asgjë kur erdhën burra për vizitë”.
Në prill, gjashtë ligjvënës të lartë amerikanë bënë një vizitë të papritur në Tajvan. Delegacioni ndërpartiak përfshinte Kryetarin e Komitetit Demokratik të Senatit për Marrëdhëniet me Jashtë Bob Menendez dhe senatorin republikan Lindsey Graham.
Burimi: BBC
