Një vrasje me armë zjarri ka ndodhur në orët e para të mëngjesit të sotëm në fshatin Shelqet të Vaut të Dejës, Shkodër.
Policia bën me dije se ngjarja ka ndodhur rreth orës 03:00 pas një konflikti për motive banale në lokalin e fshatit. Menjëherë pas sherrit autori i krimit Alfons Palushani ka shkuar në shtëpi ku ka marrë armën tip kallashnikov dhe është kthyer pranë lokalit.
Menjëherë sapo 51-vjeçari Agron Metushi është nisur drejt automjetit të tij, është qëlluar nga Palushani me armë zjarri.
Njoftimi i policisë
Më datë 23.08.2022, rreth orës 03:00, në fshatin Shelqet, Vau i Dejës, pas një konflikti për motive të dobëta, dyshohet se shtetasi A.P., 37 vjeç, banues në fshatin Stajkë, Vau i Dejës, ka vrarë me armë zjarri shtetasin A. M., 51 vjeç, banues në Shkodër.
Nga veprimet e shpejta dhe hetimet paraprake të kryera nga Policia, dyshohet se konflikti për motive të dobëta ka nisur në lokalin e fshatit dhe menjëherë shtetasi A.P., ka shkuar në banesë ka marrë armën e zjarrit kallashnikov dhe në momentin që shtetasi A.M. ka hipur në automjetin e tij për tu larguar shtetasi A.P. e ka qëlluar me armë zjarri.
Grupi hetimor nën drejtimin e Prokurorisë vijon punën në vendngjarje për sqarimin e plotë të rrethanave dhe dokumentimin ligjor të kësaj ngjarjeje.
Shërbimet e Policisë janë vënë në ndjekje të autorit dhe vijon kontrolli i zonës për kapjen e tij.
