Një familje prej 4 anëtarësh është aksidentuar në orët e para të mëngjesit në rrugën Fier-Vlorë, ku për pasojë një fëmijë 6 vjeç ka humbur jetën, ndërsa u plagosën 3 anëtarët e tjerë të familjes.
Ngjarja u regjistrua në afërsi të fshatit Panaja ku një 33-vjeçar, i cili po udhëtonte me bashkëshorten dhe dy fëmijët humbi kontrollin e mjetit duke dalë nga rruga.
Si pasojë, humbi jetën njëri nga fëmijët, ndërsa të plagosur mbeten dy prindërit dhe fëmija tjetër 3 vjeç.
“Më datë 30.08.2022, rreth orës 04:45, në aksin rrugor Fier-Vlorë, në afërsi të fshatit Panaja, shtetasi A. M, 33 vjeç, i cili udhëtonte së bashku me bashkëshorten dhe 2 fëmijët, duke drejtuar automjet tip “Benz”, dyshohet se ka humbur kontrollin e mjetit dhe ka dalë nga rruga. Si pasojë e aksidentit njëri prej pasagjerëve një fëmijë 6 vjeç, ka ndërruar jetë, ndërkohë që drejtuesi dhe 2 pasagjeret e tjerë, shtetasja A. M., 34 vjeçe dhe fëmija tjetër 3 vjeçe, ndodhen në spital e Vlorës, nën kujdesin e mjekëve”, thuhet në njoftimin e policisë.
Ndërkohë në vendngjarje ndodhet grupi hetimor, i cili po kryen veprimet e mëtejshme në lidhje me sqarimin e rrethanave të aksidentit.
