Analisti, Genc Burimi, e sheh pozitive mbajtjen e primareve nga Partia Demokratike për përzgjedhjen e kandidatëve për zgjedhjet lokale të 14 majit.
Në një intervistë për Rtv Ora me gazetaren, Kostana Morava, ai tha se përkundër risqeve ky proces duhet parë pozitivisht.
“Nga primaret do të dalë një vullnet mix, vullneti i bazës+vullneti i kryesisë. Dhe mendoj se do dalë Belind Këlliçi”.
Ai thotë se Këlliçin e shikon si figurën më të përshtatshme përballë Veliaj në garën për bashkinë e Tiranës, pasi ai nuk ka mbi shpatulla përgjegjësinë e të shkuarës.
“Më i përshtatshëm se është orator dhe i ri. Veliaj nuk mund ta kritikojë atë për përgjegjësinë e viteve të kaluara. Shpesh e majta në fushata elektorale u thotë me këta kërkoni të riqeveriseni, me Berishën, Metën, Bashën? Këlliçi nuk e ka këtë peshë të kaluarës, Veliaj i ka por jo ai. Të paktën e heq në këtë fushatë këtë lloj kurthi, kurthin e të kaluarës”.
Bujaria e Ilir Metës në marrëveshjen me Berishën për vendorët habiti jo pak analistë. Por Genc Burimi e sheh këtë një strategji për të projektuar të ardhmen si zëvendësues i Sali Berishës në krye të opozitës.
“Strategji e Ilir Metës që investon për të ardhmen. E ardhmja nuk janë bashkiakët, janë zgjedhjet legjislative. E ardhmja është dita kur Berisha nuk do jetë më në politikë, 10-15 vjet më vonë. Meta besoj se kur rruhet në mëngjes mendon që një ditë do jetë ai zëvendësuesi i Berishës, një parti unikale PD-PL. Kjo ardhje gatuhet sot, përgatitet. Për mua Meta u tregua kavalier, i tha PD dhe Berishës vendosni kë të doni”.
I pyetur se a i ka shanset Meta të rikthehet fitues dhe përcaktues si dikur, ai përgjigjet.
“Nëse kjo opozitë arrin dhe fiton shumicën e bashkive, mbi 50%, kërkon zgjedhje të parakohshme. Aty do ti kërkojë Meta Berishës ti kthejë reston. Sot është fakt se pas Berishës nuk ka një 2 në PD”.
