Kryeministri i Kosovës, Albin Kurti, ka zhvilluar një vizitë të papritur në Britaninë e Madhe.
Lajmin e ka bërë të ditur Zyra e Kryeministrit përmes një njoftimi, ku thuhet se ai zhvilloi një takim me ministrin e Punëve të Jashtme të Mbretërisë së Bashkuar, James Cleverly.
Gjithashtu mësohet se në nisje të takimit, Kurti shprehu ngushëllimet e tij për vdekjen e madhërisë së saj, Mbretëreshës Elizabeta II.
“Gjatë qëndrimit të tij në Mbretërinë e Bashkuar, Kryeministri i Republikës së Kosovës, Albin Kurti u prit nga Ministri i Punëve të Jashtme të Mbretërisë së Bashkuar, James Cleverly.
Kryeministri Kurti fillimisht shprehu ngushëllimet e tij për vdekjen e madhërisë së saj, Mbretëreshës Elizabeta II.
Në këtë takim, kryeministri Kurti e uroi ministrin e ri të Punëve të Jashtme të Mbretërisë së Bashkuar, Cleverly për detyrën e re dhe i dëshiroi suksese në përgjegjësitë e reja. Ai e falënderoi për mbështetjen e vazhdueshme të Mbretërisë së Bashkuar dhe e ftoi për bashkëpunim edhe më të thellë ndërmjet dy vendeve, në veçanti në fushën e shkëmbimeve tregtare dhe ekonomi.
Ministri i Punëve të Jashtme, James Cleverly shprehu dashamirësinë dhe admirimin britanik për Kosovën, duke çmuar lart të arriturat e shtetit të Kosovës dhe qëndrimin që Kosova po mban nga fillimi ndaj agresionit rus në Ukrainë”, thuhet në njoftimin e Zyrës së Kryeministrit.
