Ndeshja Korabi-Partizani pritej me shumë interes në Peshkopi, për vetë faktin se klubi i kuq ka shumë dashamirës në Dibër.
Për më tepër, pjesë e “demave” është edhe sulmuesi Xhuliano Skuka, një idhull për tifozët dibranë, pasi luajti për katër sezone me Korabin. “Panorama Sport” ju sjell të gjitha pikantet e ndeshjes së djeshme.
* Edhe pse shiu nuk pushoi thuajse gjatë gjithë ndeshjes, në stadium kishte të pranishëm mbi 1 mijë tifozë dibranë, ndërsa nuk mungonte as një grup i vogël ultrasish të Partizanit, të grupimit “Guerrils”, që kishin shfaqur banderolën e tyre në tribunën përballë.
* Sulmuesi Xhuliano Skuka nuk festoi pas golave në shenjë respekti për ish-skuadrën, ndërsa kur u zëvendësua, u duartrokit gjatë nga tifozët.
* Portieri dhe njëkohësisht kapiteni i Partizanit, Alban Hoxha, u rikthye titullar nga trajneri Kolela. Ashtu si në derbi, ky aktivizim i tij përkoi me një fitore të të kuqve.
Dje Hoxha nuk kishte punë vetëm me sulmuesit kundërshtarë, pasi në një moment të ndeshjes, atij iu afrua në zonë një qen, i cili kishte kapërcyer rrethimin e fushës. Mes të qeshurave të publikut, portieri i Partizanit u kujdes të largonte butësisht qenin nga fusha dhe vazhdoi normalisht lojën.
* Para se të niste ndeshja, u mbajt një minutë heshte në nderim të ish-futbollistit të Korabit, Lutfi Manjani, i cili u nda nga jeta në moshën 88-vjeçare. Ndërkohë, ai u vlerësua nga bashkia me titullin “Qytetar Nderi” pas vdekjes, si dhe nderi i klubit Korabi.
PANORAMASPORT.AL
