Një 33-vjeçar nga Berati rezulton i zhdukur prej 9 ditësh. I riu Sokol Ago është larguar nga banesa mesditën e datës 15 shkurt dhe nuk është kthyer më.
Nëna e tij ka bërë denoncimin në polici për zhdukjen e të birin, i cili rezulton konsumues i rregullt i dograve të forta.
“Në Komisariatin e Policisë Berat, ka bërë kallëzim shtetasja H. A., 62 vjeçe, banuese në Berat, se nga data 15.02.2023, është larguar nga banesa djali i saj, shtetasi S. A., 32 vjeç, banues në Berat. Po punohet për gjetjen e tij.
Materialet i kaluan Prokurorisë pranë Gjykatës së Rrethit Gjyqësor Berat, për veprime të mëtejshme”, njoftoi policia.
33-vjeçari jeton në lagjen “Uznovë” në Berat. Ai është larguar nga banesa mesditën e 15 shkurti dhe që prej asaj dite familjarët nuk kanë asnjë informacion për vendndodhjen e tij.
Sokol Ago ditën që u zhduk kishte veshur një palë pantallona xhins ngjyrë blu, një xhup të zi meshinë dhe këpucë të zeza, ndërsa celularin e ka lënë në shtëpi.
